KHAWTHLIR
Women's Day
Nimin kha International Women's Day a ni a, he ni pual hian prime minister Narendra Modi-in Deendayal Antyodaya Yojana - National Rural Livelihoods Mission (DAY-NRLM) hnuaia self help group (SHG)-te Varanasi-a intawhkhawmna a neihpui chu Keiṭum YMA Hall aṭang pawhin telivision (big screen) hmangin a huhoin an chhim. Kumina International Women's Day thupui chu 'Think equal, build smart, innovate for change' tih a ni.
YMA conference
Langkaih Group YMA chuan Kanhmunah conference an hmang a, nimin khan Health secretary H Lalengmawia'n a hmanpui a, conference ṭanpui nan Rs. 30,000 a pe. Langkaih Group YMA-ah hian branch 14 awmin, member 4,000 vel an awm a; conference-ah hian rorel palai 250 vel kalin, agenda pasarih an ngaihtuah a ni.
Journalist Meet
Lunglei, Lawngtlai leh Siaha district-a journalist-te chuan March 7, Ningani zan khan lawngtlai Press Club-ah 'Chhimbial Journalists' Meet' an hmang. Journalists' Meet programme kal zelah hian nimin khan journalist-te chuan Kaladan Multi Modal Transit Transport Project kawngpui sial mek chu ramri Zochachhuah thleng an tlawh a, vawiin hian Lawngtlai tui lakna Greater Lawngtlai Water Supply Scheme treatment plant an tlawh leh ang.
Lirthei tlân khap
Traffic SP Rodingliana Chawngthu chuan thupek chhuahin, Ramrikawn aṭanga Lungverh péng (NH-54) via Sakawrtuichhun kawngpuiah truck (909) leh a aia lian lirthei tlan phal loh a nih thu a tarlang.
ODF meeting
Open Defecation Free (ODF) Verification team member-te chu nimin tlai khan an chairman thar Amjad Tak, PHE secretary hoin an ṭhukhawm a, tun hnaia ODF Verification team member-te fehchhuahna report an sawiho. ODF ni tura hmalakna a ṭha thawkhat hlawm a, ek-in nei lo tlem a zawng an la awm thung tih an tarlang.