Cold Room enchhin men

Covid-19 vanga sorkarin inkhârkhip a kalpui mekah mipuiin ei leh barah harsatna an tawh lohna tura Mizoram sorkarin Vegetable Supply Chain a duanah, thlai tharte dahṭhatna atan chief minister Zoramthanga ruahmannain Horticulture department chuan Sairanga Cold Chain Development Project a kalpui mekah Cold Room a siam a; bawkbâwn hralh chhuah lohte dah chhin (trial run) nan ruahman mek a ni.

Sorkar thuchhuah tarlan danin, sorkar laipuiin Mizoram tan Mission for Integrated Development of Horticulture (MIDH) hnuaiah Cold Chain Development Project a siam a, chumi hmang chuan thil chi hrang - integrated packhouse, cold room, ripening chamber, refrigerated van  (vûr bâwm motor) leh a dangte dah a ni.

Sairangah a hmunpui (main hub) ruahman a ni a, district hrang hrangte nen refrigerated van-a thlun zawm tum niin, refrigerated van leh pick-up truck panga ve ve lei a ni tawh. Horticulture department chuan cold room leh a kaihhnawih ṭul dangte buatsaih hna thawk tura a thlan Rinac India Ltd., Bangalore chuan cheng nuai 250 hmangin an buaipui a; building pumpui chu sq.ft. 3,950-a zau niin, cold room pindan palite chu a vaiin quintal 800 dawng a ni.