Police motor chesualah mi 1 thi

Nimin chawhma dar 10 vel khan Bunghmun Police Station motor (Gypsy) MZ-01 K-4402 chu Bunghmun leh Tleu inkarah chesualin, kawng thlangah a tla a, a hmunah Duhkima (65) s/o Zawngauva (L), Bunghmun a thi a, hliam an awm bawk.

Thu dawn danin, motor-ah hian mi pasarih an chuang a; Bunghmun PS officer-in-charge Lalzuitluanga leh police dang pahnih - constable Lalnunzira (driver) leh constable Michael Zodinthara te bakah, civil mi pali - Hranglura (70), Duhkima (65), Hmingchhuanga (22) leh Lalmuankima te an ni. Michael Zodinthara leh Hranglura, Bunghmun-te chu an hliam nat deuh avangin Bunghmun damdawi-ina lak a nih hnuah Lunglei panpui an ni.

Bunghmun police-te hi Bunghmun tui lâkna pipe, motor-in a rah chhiat enfiah tura kal an ni a; motor hi kawng thlangah ft. 20 vel a lum a, chetsual chhan hriat a ni lo.