Hmangaihna leh hmasawnna hmangin Hmar thimpui tih-ên kan tum - Speaker

Assembly speaker Lalrinliana Sailo chuan, hmangaihna leh hmasawnna tih thupuia hmangin hmar thimpui, zángkhaw bungbut hnan an sut ên dawn thu a sawi.

Chalfilh bialtu MLA hian Khawlian khuaa Tuivai Group YMA conference Ningania a hmanpuinaah thu sawiin, "H formula pathum - 'Hmar tlangdung hmangaihna leh hmasawnna' tih thupuia hmangin hmar thimpui zángkhaw bungbut hnan tia an sawi ṭhin hi sut ên kan tum. Khawtlang leh tlawmngai pawl hruaitute bakah, kohhran hote nen lungrual taka thawhho loh chuan a harsa ang," a ti.

Speaker chuan, 'Ram leh hnam humhalh' tih chuan kuttum lek emaw, hriamhrei lek emaw lam a kâwk lo tih sawiin, "Engtin nge Zoram nuam kan siam theih ang tih hi kan rilru put hmang tur a ni a, a bul berah chuan ei leh bar zawn kawng­ah Mizote hian engtin nge hma kan sawn lehzual ang tih hi ngaihtuah a ngai a ni," a ti a; Mizo ṭhalaite chu danin a khap thil ni loah chuan thawh hreh nei lo turin a chah.

Lalrinliana Sailo chuan, social media hman thiam a pawimawh thu pawh sawiin, "Kan ṭhiante emaw, mi dang tute pawh kan Mizopuite an lo chesual deuh a nih pawhin, social media-a thehdarh loa ṭha taka inchhanchhuah dan kawng dap a ṭha zawk," a ti.

Tuivai Group YMA Conference hi March 5-7 chhung khan neih a ni a, Ningania vantlang inkhawmah hian an member March 2018 leh February 2019 inkara thi mi 22 (mipa 15 leh hmeichhia pasarih)-te sûnna hun neih a ni.