Hna reng reng quality kan control ang - Lalrintluanga Sailo, MLA

MNF chuan nimin khan an party pisa, Mizo Hnam Rûnah chhung inkhawm an nei a; thu sawitu Govt. deputy chief whip Lalrintluanga, MLA chuan, sorkar hnuaia hna thawh reng reng a ṭhat theih nan an vil ṭhat dawn thu a sawi.

Lalrintluanga Sailo chuan, Congress sorkarin kum 10 chhunga kawng an siam theih loh chu MNF sorkarin thla hnih chhung lekin an siam-

ṭha nia sawiin, mipui beisei ang ngeia hna thawh ṭhat zel an tum thu a sawi a, "Kan official-te zingah Pu Hawla bâl bet tlat kai an la awm. Keini chu 'Pathian leh kan ram tan' titute kan nih angin, kan rilru leh ngaihtuahna a danglam tur a ni. MNF hnathawh reng reng chu a tloin a ṭha tur a ni a, hnathawh reng rengah quality kan control ang," a ti.

Mizoram hmun hrang hrangah siamṭhat ngai a tam hle tih an hmu tih sawiin, "A hmasa berah chuan moral reformation a ṭul. Congress sorkar kum 10 kal taah khan Pu Hawla leh a hote'n min hnutchhiah kha siamṭhat hmasak a ngai. Thìrbél kum 10 chhung, tél mawm nena an lo chhuan ût tawh, tuisik hlanga silfai mai theih loh bâl bet tlat a tam. Vision nei hauh loin ram an hruai a, tum mumal an nei hek lo," a ti a; thil awm lo ata bul ṭan a ngaih phah niin a sawi.

Bamboo Development Committee vice chairman Dr K Pachhunga, MLA-in Karnataka leh Tamil Nadu-a mau chungchang zira an zin chungchang a sawi a, "Kan mau luangral mai mai tur hi chhawr ṭangkaiin, mau chi ṭha zawk, lian leh man tam thei zawk tur kan chawlut ang. Kan CM Pu Zoramthanga'n mau a tuipui hi han zir chian chuan vision ṭha tak nei a lo ni," a ti.