Minister-in YMA inkhawmpui a hmanpui

Sakawrhmuituai Group YMA chuan Serkhanah conference an hmang a, Ningani zan khan minister Lalruatkima'n a hmanpui.

Lalruatkima chuan, Pathianin ram min pek hi a neitu nihna angin humhalh tlat tur a nih thu sawiin, "Kan ram hi hnam dangin an luah theih lohna tur dan ṭha tak kan nei a, ram neitute'n kan kenkawh a ngai. Kan ramte hnam dang lakah kan hralh thiang lo a, he mi thuah hian sorkar pawh a fimkhur hle a ni," a ti.

Khawvelah ram leh hnam humhalh tur nei lo tam tak an awm tawh laia ram leh hnam humhalh tur neia Mizo an la awm chu vanneihthlak a tih thu sawiin Lalruatkima chuan, "Zu leh ruihhlo vangin thihna a tam hle a, hnam kal zel tur hi ngaihtuah chian a ngai ta hle a ni," a ti a; Mizoram ngeiah hnam dangin Mizote thawh thiam leh thawh theih reng an thawh avangin inbih chian a ṭul thu a sawi.

Conference-ah hian Central YMA finance secretary Fabian Lalfakawma'n YMA kumpuan thupui hmangin thu a sawi. Sakawrhmuituai Group YMA-ah hian branch panga - Serkhan, Nisapui, Lungmuat, Lungdai leh Sentlangte an awm a ni.