Túmkau Ní
Nimin kha Isua Krista, Jerusalem-a lal anga a luha mipuiin ropui taka an chawimawina ni champha Túmkau Ní a ni a, inkhàrkhip vangin kum dang angin túmkau chawiin kawngzawh huaihawt theih ni lo mah se, mipuite'n an remchan ang angin Isua chawimawina hun an hmang.
Aizawla veng tam berah chuan vantlang aurinna aṭanga kaihruaiin kohhran pawl bik thliar loin, naupang aṭanga puitling thlengin Isua chawimawina hun hman a ni a, Aizawl páwn lam khaw tam takah hun hman a ni bawk. Mipuite chu "Hosanna! Lalpa hminga lo kal chu fakin awm rawh se, ram lo thleng tur, kan pa Davida ram chu chawimawiin awm rawh se. Chungnung berah khian Hosanna!" tiin kawt záwl, in chung, bathlâr leh tukverh aṭangtein an au rual a ni.