Vawk hri léng leh vawk thih chhan African Swine Fever tih finfiah a ni

March 21, 2021 hnuah nimin chawhma lam thleng khan Mizoram hmun ṭhenkhatah vawk 671 a thi tawh a; vawk thi tam ber thih chhan chu African Swine Fever a ni tih finfiah a ni tawh.

Animal Husbandry & Veterinary minister Dr K Beichhua hoin nimin khan Secretariat conference hall-ah sorkar hotute an ṭhukhawm a; African Swine Fever (ASF) chung­changa hmalak dan tur an sawiho.

Ṭhutkhawmah hian, nimin chhun thleng khan Mizoram hmun hrang hrangah vawk hri léng vangin vawk 671 a thi tawh tih an tarlang a; National Institute of High Security Animal Diseases (NIHSAD), Bhopal-a vawk sample thawn result-ah vawk thih chhan chu ASF a ni tih finfiah a nih tawh thu an tarlang bawk.

Meeting-a tarlan danin, vawk thih chhan ASF a ni tih finfiah ni tawh mah se, serotype hriatna turin genome sequencing tih leh a ngai a, chumi result chu vawiinah emaw, naktukah emaw hriat theih beisei a ni.

NIHSAD, Bhopal hian ASF a ni tih an nemngheh chuan sorkar laipuiah an hriattir ang a, sorkar laipuiin dan angin a puang ang. Mizoram sorkar chuan sorkar laipuiin a puan hun a nghak mek.

ASF kái vawk chu enkawl dam theih a ni lo a, a thi ngei ngeia ngaih a ni. ASF hri laka venna damdawi (vaccine) a awm loh avangin Mizoram pumah a darh lohna turin rang taka inven a ngaih thu an sawi a; sorkar chauh ni lo, mipui mimir ṭan tlân a ngaih tur thu an sawi a ni.

ASF laka invêng turin hri lênna hmun aṭangin vawk, vawk sa lam chi ei tur reng reng lâk luh loh tur a ni a; ran-in leh a chhehvelte damdawi hmanga tih­thianghlim ṭhin tur a ni. Vawk, vawk-in leh a chhehvelah saphi­hrik a awm theih loh nan damdawi (insecticide) hmanga vên a ṭha bawk.

Hetih lai hian, Mizoram sorkara AH&Vety department chuan tun hnaia vawk eng emaw zat thihna hmun - Lungsen, Lung­lei Electric Veng, Zawlnuam, Eden­thar Veng leh Armed Vengte chu infected area-ah a puang tawh a ni.