Shifting cultivation zâwi zâwia tihtawp a ṭul - Agriculture Minister

Agriculture minister C Lalrin­sanga chuan, lo vâta hun rei lote chhung atan chauha neih ṭhin (shifting cultivation) chuan environment a tihchhiat avangin zâwi zâwia tihtawp a ṭul thu a sawi.

Nimina a pisaa FOCUS project thlirletnaah Agriculture Minister chuan, "Ka rilrua lian em em chu shifting cultivation kalphung thara thlak a ni. Shifting cultivation hian environment a tichhe nasa a, mahse, kan culture a nih avangin kan kalpui lo thei lo. Zâwi zâwia tihtawp dan zawn a ṭul a ni," a ti a; environment tichhe lo zawnga lo neih dan zawng turin Agriculture department-a mithiamte a chah.

C Lalrinsanga chuan, FOCUS-in a tum lian tak chu, economy lama hmasawnna leh sik leh sâ chhe zel tur vèn a nih thu sawiin, "FOCUS hnuaiah hmalakna hrang hrang, thingtlang mite economy tiṭha tur, environment tichhe chuang si lo hmuh chhuah a pawimawh," a ti.

Thawktute fuihna thu sawiin Minister chuan, "Hmalak dan ṭha tâwk lo lai leh ṭha zawk hria chuan sawi hreh loh tur. Chumi a nih loh chuan review meeting hian awmzia a nei dawn lo," a ti a; sorkar hna chu hlawh hmuhna atan mai ni lo, ram leh hnam siamṭha tura mawhphurhna a ni tih hriat nawn fo a ṭul thu a sawi.

Agriculture Development Board vice chairman H Biakzauva, MLA pawhin thu sawiin, FOCUS chu kalpui ve lohna district-te'n an awh thu a sawi a, "A duh apiang district-ah kalpui mai theih a ni. Tuna kalpuina district paruk hi agriculture & allied lama district dangte entawntlaka an awm a ṭul dawn. FOCUS hmangin kan ram hmasawnna hna thawk tura inbuatsaih a ṭul," a ti.

Review meeting hi video conferencing hmanga neih a ni a, International Fund for Agriculture Development (IFAD), Delhi-a an hotute leh FOCUS kalpuina district-a thuneitute an tel.

FOCUS hi IFAD leh Mizoram sorkar thawhhona project a ni a; Agriculture, Horticulture, AH&Vety, Land Recources, Soil & Water Con­servation lama hmalaknate a huam. Champhai, Kolasib, Serchhip, Mamit, Khawzawl leh Saitual district-ahte kalpui mek a ni a; sum dawn tawh cheng vbc. 83 aṭangin vbc. 48 hman tawh a ni.