KHAWTHLIR

Supply Minister kâwm
Mizoram State Food Commission (MSFC) member-te chuan nimin khan FCSCA minister K Lalrinliana chu a pisaah an kâwm. MSFC hi May 1, 2018 khan National Food Security Act (NFSA), 2013 tlawhchhana din a ni a, NFSA kalpui a nih dan vil a, a ṭul anga endiktu tur an ni. MSFC chairman chu HL Rochungnunga a ni a, member dang panga an awm.

Kuhva rah man
Assam Rifles leh Champhaia Custom Preventive Force-te chuan April 12, Thawhṭanni khan Champhai Ruantlangah Myanmar aṭanga lak luh kuhva rah ip 55 an man a, a neitua puh mi pakhat an man tel nghal. Kuhva rah an man hi Rs. 7,70,000 vel mana chhût a ni.

Heroin man
Central YMA hnuaia Vigilance Sub-Committee leh CID (Crime)-a Special Narcotics PS-a mite chuan April 12, Thawhṭanni tlai khan heroin gram 36.510 leh a neitua puh F Laltlanthanga (47) s/o F Lalvuana (L), Khatla South nia insawi an man. Heroin hi tualchhunga hralhna ang chuan Rs. 1,53,000 man a ni.

Run for Fitness
Lungleia Assam Rifles chuan nimin zing khan Fit India Movement hnuaiah Lungleiah 'Run for Fitness' an huaihawt a, AR sipai 32 leh tualchhung mi 21 an tel. Run for Fitness hi miin rilru leh taksa hriselna ṭha zawk an neih theihna tura buatsaih a ni.

Minister-in tlawh
Health minister Dr R Lalthangliana chuan nimin khan Sialsuk damdawi-in (primary health centre) thar tur sak mek a tlawh. Minister hi medical officer Dr HJ Lalnunpuia hoin thawktute'n an lo dawngsawng a, an hnathawh dan leh hmalaknate an lo hrilh. PHC sak nan NABARDB (RIDFXVI) aṭanga hmuh cheng nuai 230 ruahman a ni a, CB Engineering-in an sa a ni. Minister hi bialtu MLA Prof. F Lalnunmawia leh Health secretary Lalramnghaka ten an ṭawiawm.