MP Vena'n Myanmar ráltlânte a tlawh

Rajya Sabha MP K Vanlalvena chuan April 12, Thawhṭanni khan Serchhip district-a Lungkawlh khuaa Myanmar ráltlân awm mekte a tlawh a, an dinhmunte a zawtfiah. MP hi Lungkawlh Refugee Committee hruaitute'n an lo dawngsawng a ni.

Lungkawlh khuaah hian Myanmar aṭanga ráltlân mi eng emaw zat an lut tawh a, mahse, Aizawl leh hmun dangah an insawn leh deuh vek tawh. Tun hnaia thleng thar mi 13 chiah an awm mek a; Tahan, Leisen leh Dawn khua aṭanga rawn kalte niin, Zo hnahthlak civil mi vek an ni. North Vanlaiphai khuaah chhûngte bèl Myanmar ráltlân mi 20 vel an awm mek bawk.

Rajya Sabha MP hian April 8, 2021 khan Falkland Veng, Aizawla Myanmar ráltlân awmte a lo tlawh tawh bawk a ni.