Serchhipah SVEEP Marathon neih a ni

Nimin zing dar 7:30 khan Serchhip district election officer (DEO) Kumar Abhishek, bawrhsap chuan DC pisa tual aṭangin Systematic Voter’s Education and Electoral Participation (SVEEP) Marathon-a tlân turte a vailiam.

Marathon-ah hian mipa 88 leh hmeichhia 26, an vaiin mi 114 an tlân a; DC pisa tual aṭanga tlân ṭanin, Serchhip AOC Veng - P&E Vengah an kual a, DC pisa tualah an tàwp a ni.

Mipaah Lalthanpuia, Dinthar Veng pakhatna niin, Rs. 5,000 a dawng a; pahnihna Laltlansanga, IOC Vengin Rs. 3,000 leh pathumna Lal­-chhan­­chhuaha, P&E Vengin Rs. 2,000 an dawng.

Hmeichhiaah Lalngaihawmi, Khawtetlang pakhatna niin, Rs. 5,000 a dawng a; pahnihna Lalmuanpuii, Serchhip Venglaiin Rs. 3,000 leh pathumna Lalhriatpuii, Chanmari Vengtharin Rs. 2,000 an dawng. A tel zawng zawngin t-shirt an dawng vek bawk.