Aizawlah vawk sa a hnawng ṭan

Tun hnaia Mizoram hmun ṭhenkhata vawk hri léng avangin Aizawl khawpuia vawk sa zuarte'n harsatna an tâwk a; mipuiin vawk sa an lei ṭhat duh rih loh avangin vawk sêr ṭhin eng emaw zatin an chawlhsan rih.

Aizawl hmun hrang hranga vawk sa zuarte Vanglaini palaiin a kawmnaah, vawk hri léng avangin vawk sa hralh a harsat thu an sawi a, "Vawk hri léng thut avang hian a hriin a la tih buai loh vawk neitute'n an hlauthawng a, talh tur an neih thu min hrilh nasa. Mahse, kan inhralh theih miau loh avangin kan talh séng lo," an ti.

New Market-a sa zuarte chuan, vawk hri léng avangin sa dang pawh hralh a harsat phah thu an sawi a; hri lèn hmain Inrinniah vawk pum thum velte an sêr zawh vek ṭhin thu sawiin, "Kar hmasa Inrinni khan vawk pakhat ṭheuh kan talh a, kan hralh zo lo nasa," an ti a, Inrinnia an hralh zawh lohte ni dangah an ṭhutpui a ngaih thu an sawi.

Treasury Square bazara vawk sa zuarte chuan, vawk hri lèn hma chuan Inrinniah seat pakhatin vawk panga vel an talh ṭhin thu leh Inrinni ni lo, ni dangah chuan pahnih/khat vel an talh ṭhin thu an sawi a, "Vawk hri lên hma chuan a lei duhte'n an inchan meuh lo, zingah kan hralh zo vek ṭhin. Tunah chuan Inrinniah pawh vawk pakhat hralh zo thei lo an awm tawh a ni," an ti.