COVID-19: Mizoram dinhmun Hripui vei 36 hmuh belh a ni

April 12, Thawhṭanni khan Mizoramah Covid-19 vei mi 36 hmuh chhuah a ni a, an zinga a tam zawk chu tun hnaia state páwn aṭanga rawn lut an ni. Nimin khan hripui laka fihlîm tawh mi pakhat, Durtlang BSUP CCC aṭangin chhuahtir a ni.

Covid-19 vei hmuh thar mi 36-te mipa 17 leh hmeichhia 19 an ni a, ZMC laboratory-a hmuh chhuah mi panga leh RAT hmanga hmuh chhuah mi 31 an ni. An zingah Myanmar aṭanga rawn lut mi pahnih an tel. TrueNAT-PCR hmanga swab sample endik zingah hripui vei an awm lo.

Mizoramah Covid-19 vei mi 4,655 hmuh chhuah a ni tawh a, mipa 3,348 leh hmeichhia 1,307 an ni. Nimin tlai dar 5 thleng khan mi 4,469 (96.00%) chhuahtir an ni tawh a, mi 12 (0.26%) thi tawhin, enkawl mek mi 174 (3.74%) an awm.

April 12, Thawhṭanni khan ZMC laboratory-ah swab sample 141, TrueNAT-PCR hmangin district pali-ah sample 73 leh RAT hmangin district pakuaah sample 1,446 endik a ni a; sample endik zawng zawng chu 1,660 (mipa 1,042 leh hmeichhia 618) niin, chu'ng aṭanga hripui vei hmuh pasarih chu 2.20% a tling.

Hripui vei hmuh chhuah thar mi 36 zinga mi 17 chu Mizoram chhunga kái chhâwng nia hriat an ni a, mi 19 chu state páwn aṭanga rawn lut hlim leh tun hnaia rawn lutte an ni. Mi 36 zingah natna (symptom) lang mi 14 an awm a; tualchhunga kái mi 17 zingah hri kàina hriat loh mi pakua an awm bawk.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,677 hmuh chhuah a ni tawh a, TrueNAT-PCR hmangin 682 leh RAT hmangin 1,295 hmuh chhuah a ni tawh.

IDSP Bulletin tarlan danin, April 11, 2021 thlengin Mizoramah swab sample 2,64,490 endik a ni tawh a, chu'ng aṭanga Covid-19 positive hmuh tawh zat 4,655 chu 1.76% a ni. Hripui vei hmuh tawh zinga mi 2,213 chu Mizoram chhunga kái chhâwng an ni a, mi 2,442 chu Mizoram páwn aṭanga an rawn luh hnua hmuh chhuah an ni thung.

Covid-19 vei hmuh tharte
ZMC LABORATORY-A HMUHTE
Damveng - 2: Mipa kum 38 leh hmeichhia kum 65; tualchhunga kai, home quarantine lai, symptom nei lo ve ve.
Tlangnuam Vengthar - 1: Hmeichhia kum 25, Mizoram páwna missionary, April 9-a West Bengal aṭanga Lengpui Airport a thlen tirha RAT negative, a hnua symptom a neih vanga sample endik nawn.
Kanan Veng - 1: Hmeichhia kum 31, April 10-a Guwahati aṭanga Lengpui Airport a thlen tirha RAT negative, a hnua sample endik nawnnaa positive, symptom nei lo.
Kulikawn - 1: Hmeichhia kum 24, April 3-a Guwahati aṭanga Lengpui Airport a thlen hlima RAT negative, a hnua symptom a neih vanga sample endik nawnnaa hmuh chhuah.

RAT HMANGA HMUH CHHUAH
Falkland Veng - 1: Mipa kum 59, Delhi aṭanga haw, Lengpui Airport-a hmuh chhuah, symptom nei lo.
Maubawk - 2: Hmeichhia kum 21 & 36, Delhi leh Bangalore aṭanga haw, Lengpui Airport-a hmuh chhuah, symptom nei ve ve.
Salem Veng - 1: Hmeichhia kum 25, Hyderabad aṭanga haw, Lengpui Airport-a hmuh chhuah, symptom nei lo.
Zemabawk - 1: Hmeichhia kum 15, Hyderabad aṭanga haw, Lengpui Airport-a hmuh chhuah, symptom nei.
Lunglei - 3: Mipa kum 21 & 36 leh hmeichhia 1; Delhi aṭanga haw 2 leh UP aṭanga haw 1, Lengpui Airport-a hmuh chhuah, symptom nei lo vek.
Siaha - 1: Mipa kum 29, Kolkata aṭanga haw, Lengpui Airport-a hmuh chhuah, symptom nei lo.
Tuikual - 1: Hmeichhia kum 59, Kolkata aṭanga haw, Lengpui Airport-a hmuh chhuah, symptom nei.
Lawngtlai - 1: Hmeichhia kum 22, Hyderabad aṭanga haw, Lengpui Airport-a hmuh chhuah, symptom nei.
Chanmari - 1: Mipa kum 20, SRH-ZMC OPD-a hmuh chhuah, symptom nei, hri kàina hriat loh.
Electric Veng - 1: Hmeichhia kum 68, symptom neih vanga private hospital-a sample endik, hri kàina hriat loh.
Chanmari West - 2: Mipa kum 25 & 27, symptom nei lo ve ve; pakhat zawk Aizawl-Guwahati maxicab driver niin, a passenger zingah positive an awm avanga sample endik.
Dawrpui - 1: Hmeichhia kum 47, private hospital-a sample endik, hri kàina hriat loh, symptom nei lo.
Venghlui - 1: Mipa kum 78, tualchhunga kái, hri kàina hriat loh, symptom nei lo.
Armed Veng South - 1: Hmeichhia kum 31, tun hnaia Shillong aṭanga haw, symptom nei.
Upper Republic - 1: Mipa kum 27, Myanmar aṭanga rawn lut, private hospital-a sample endik, symptom nei lo.
Chhinga Veng - 1: Hmeichhia kum 22, Myanmar aṭanga rawn lut, private hospital-a sample endik, symptom nei lo.
Hnahthial - 1: Hmeichhia kum 46, private hospital-a sample endik, hri kàina hriat loh, symptom nei lo.
Chaltlang - 2: Mipa kum 7 & 43; private hospital-a sample endik, hri kàina hriat loh, symptom an nei ve ve.
Bethlehem Veng - 2: Hmeichhia kum 32 leh mipa kum 43. Hmeichhia zawk positive hmuh tawh nena inkungkaih, symptom nei. Mipa zawk inrinhlelh vanga private hospital-a sample endik, hri kaina hriat loh, symptom nei lo.
Ramthar Veng - 1: Hmeichhia kum 23, private hospital-a sample endik, hri kàina hriat loh, symptom nei lo.
Maharashtra - 1: Hnam dang mipa kum 36, April 11-a Aizawla thleng, private hospital-a sample endik, symptom nei lo.
Champhai Vengthar - 1: Hmeichhia kum 28, symptom neih vanga sample endik, hri kàina hriat loh.
RKRTP Construction - 3: Mipa kum 25-36 inkar, Uttarakhand, Delhi leh Tuithumhnara mi, an zinga pahnihin symptom an nei.