Langkaih YMA-in IR awmna chei ṭhatah Mizoram sorkar hmalakna an ngaichâng

YMA, Langkaih Group chuan tun hnaia ramri buai avanga Thinglian hmun Mizo IR duty-te awmna hmun chei ṭhat chungchangah sorkar hmalakna an ngaichâng.

Langkaih Group YMA inkhawmpui, March 5, 2021-a neih chuan, 'Ramri venga kan sipaite inkulhna hi fûrpui a thlen hmain sorkarin sa ṭha rawh se' tih an rél a ni. Vanglaini zawhna chhangin Langkaih Group YMA hruaitute chuan, IR awmna chei ṭha turin sorkarin hmalakna a neih an la hriat loh thu an sawi.

YMA Central Coordi­nation Committee, vawiina neih tumah tel pahin sorkar hotute dàwr an tum thu sawiin Langkaih YMA hruai­tute chuan, "Committee meeting ṭhulh a nih bakah minister-te interview a theih leh tak si loh avangin kan rawn kal leh dawn ta lo," an ti.

Langkaih Group YMA hruaitute chuan, sorkar hma­lakna an ngaihchàn reng thu sawiin, "Sorkarin hma a lak loh chuan meeting neiin a ṭul angin hma kan la ang. A ṭul chuan chei ṭhat hna pawh kan thawk mai ang," an ti a; tuna an hmunhma angah chuan IR-te chu fûrpui hmachhawntir chi an nih loh thu an sawi.