Vote thlâk hun pawtsei turin ZPM party-in ECI an ngen

ZPM party chuan, April 17, 2021-a Serchhip biala Assembly by-election neih turah Mizorama kohhran ṭhenkhat - Seventh Day Adventist, Church of God, Assembly of God, etc. ten vote an thlak ṭhat zawk theih nan vote thlak theih hun chhung pawtsei turin Election Commission of India (ECI) an ngen.

ZPM hian Chief Election Commissioner hnena thleng tura ngenna lehkha, ZPM general secretary (i/c Election) F Lalngheta hminga an ziah chu nimin khan joint chief electoral officer David Liansanglura Pachuau hnenah an thehlut a ni. Joint CEO chuan lehkha chu ECI-ah a thlen nghal tur thu a sawi.

Serchhip biala MLA by-election-a vote thlak hun tura ECI-in a duan chu zing dar 7 aṭanga tlai dar 6 thleng a ni a; Sabbath serhte'n ni tlak hnuah vote an thlak theih avangin vote thlak theih hun chu tlai/zan dar 7 thleng hawng turin ZPM chuan ECI an ngen a ni.