NESO-in Myanmar buaina an sawiho

India hmarchhak state zirlai pawlte inzawmkhawmna, North East Students Organisation(NESO) chuan April 12, Thawhṭanni khan video conference hmangin Myanmar buaina chungchang an sawiho a; NESO Finance secretary Ricky Lalbiakmawia, Council member C Lalremruata leh MZP assistant general secretary Jacob Lalmuanpuia te an tel.

NESO tarlan danin, Myanmar mi, a bik takin Sagaing region leh Chin state-a chengte leh India hmarchhaka state pali - Mizoram, Manipur, Nagaland leh Arunachal Pradesh-a mite hnam zia, nunphung, inkungkaihna, chawrchhuahnate leh inunaunate an sawiho a ni.

NESO hruaitute chuan thutlukna siamin, Myanmar sipaite'n mipui thlan sorkar paihthla a, thisen chhuahna an thlentir chu pawi an tih thu an tarlang a, "Sipaite'n an mi leh sate an nghaisaknaah hian democracy leh human right an rap betah kan ngai a, râwng taka an chêtna hi kan dem a ni," an ti.

NESO chuan, thisen chhuahna leh innghaisakna tireh tur leh Myanmar ramah democracy tun din leh a nih theih nan Myanmar sipaite a na thei ang bera nawr turin India sorkar an ngen.

Myanmar rama mite chu India hmarchhak state ṭhenkhatte nen inkungkaihna nei an ni tih sawiin, Myanmar mi, sahimna zawnga hmarchhak state palia lutte dinhmun zir chiang tur leh ráltlânte thawn kîr theih an nih hma loh chu chhawm­dawla ṭanpui turin India sorkar leh state sorkarte an ngen bawk.

NESO-ah hian hmarchhak state-a zirlai pawl pariat - MZP, Khasi Students Union (KSU), All Assam Students Union (AASU), Naga Students Federation (NSF), Twipra Students’ Federation (TSF), All Manipur Students Union (AMSU), Garo Students Union (GSU) leh All Arunachal Pradesh Students Union (AAPSU)-te an tel a ni.