Ruihhlo eng emaw zat man a ni

Excise & Narcotics department (END) leh an thawhpuite chuan Thawhṭanni leh nimin khan ruihhlo eng emaw zat an man a; ruihhlo vanga mante lakah The Narcotic Drugs & Psychotropic Substances Act, 1985 tlawhchhanin thubuai an ziak lut.

END enforcement-te chuan nimin chawhma dar 10:50 khan Tuirial Airfield Vengah heroin gram 144 leh a neitua puh Cindy Lalruatfeli (23) d/o Siamhnuna, Tuirial Airfield Veng nia inchhál an man a; chawhnu dar 1:30 khan Rangvamual Mel-2 ah ganja kg. 5.300 leh a neitua puh Moses Vanlalmuanpuia (39) s/o Lalchungnunga, Rangvamuala khawsa nia inchhál an man bawk.

April 12, Thawhṭanni tlai dar 5 khan Hunthar Vengah heroin gram 54 an man a; a neitua puh mi pahnih - Lianhmingthanga (48) s/o Liandawla leh Lalremruata (30) s/o Zonunsanga, Hunthar Veng nia insawite pawh an man nghal.

Thawhṭanni vek zan dar 10:20 khan END leh Central YMA hnuaia Vigilance Sub-Committee-te chuan Aizawlah heroin gram 29 leh Nitrazepam (NAP-10) mûm 130 an man a, a neitua puh Esther Lalhmunmawii (37) d/o Ramhluna, Kanan Veng, Aizawl nia inchhál an man bawk.