Covid-19 vaccine pek dan tur sawiho

Aizawl district bawrhsap Dr Lalhriatzuali Ralte hoin April 12, Thawhṭanni khan DC conference hall-ah sorkar hotute an ṭhukhawm a; Aizawl district-a Covid-19 vaccine tam zawk a thlen huna hmalak dan tur leh hmalak tawh dante an sawiho.

Dr Lalhriatzuali Ralte chuan, Aizawl Municipal Corporation huam chhungah Covid vaccine pekna hmun session site 13 awm mek chu vaccine drive nasa zawka kalpui a nih dawn chuan a tâwk lo tih a sawi a, "Tam zawk siam belh tum a ni a, session site awmna venga local council-te pawhin medical team-te a ṭul anga an puih a pawimawh," a ti.

AMC mayor Lalrinenga Sailo chuan, "Aizawl mipui himna tura hmalaknaah AMC-in tih tur a nei a, councillor zawng zawng pawhin an ward chhunga Covid hri danna kalpui mek an ngaihven reng a ni," a ti a; an ṭangkaina tur apiangah hman ṭangkai turin an inhuam reng thu a sawi.

State immunization officer Dr Lalzawmi tarlan danin, Covid vaccine chu nimina pek chhuah tur chiah a awm tawh a, vaccine chah mek a thlen thuai beisei a ni. April thla chhunga second dose dawng tur leh voter ID behchhana chhinchhiah tawh kum 45 chung lam, hri danna la turte tan dose 2,00,000 chah mek a ni a; Mizoramah session 44-in vaccination drive kalpui mek a ni.

Aizawl district chhung, AMC páwn lamah chuan CHC leh PHC-a medical officer-te ruahman angin Covid vaccine pek kalpui a ni a, vaccine pe turin nursing institution eng emaw zat aṭangin volunteer ṭhahnem takin hming an pe tawh bawk.