Mamitah Covid-19 chungchang hmalak dan tur rêl

Mamit District Level Committee on Covid-19 chu nimin khan bawrhsap Dr Lalrozama hoin Mamit DC conference hall-ah an ṭhu a, tun hnaia Covid-19 hri léng chungchanga hmalak dan tur an sawiho.

Ṭhutkhawmnaah hian, Covid-19 darh zel tur vèn nan executive duty inruat leh an rel a; mipuiin thupek an zawm ṭhat lehzual theih nan SP kaihhruaiin police duty ni se, an ti. Sorkar pisaah SOP zawm leh zawm lo endik turin inspection team din a nih tawh thu an tarlang a; Covid vei enkawlna turin ventilator pali an neih thu te, critical trained nurse leh oxygen central line an neih loh avangin harsatna an tawh theih thute tarlan a ni bawk.