Aizawlah tui a harsa : PHE dept-in Aizawl khawpuiah Connection thar pek a phal rih lo
PHE department chuan nimin khan hriattirna (circular) an chhuah a; thu leh awm hma chuan Aizawl khawpuiah tui connection thar pek a nih tawh rih dawn loh thu an tarlang.
PHE department chuan, Aizawl khawpuiah mihring an pun zel avangin tui mamawhna a sang chho hle tih tarlangin, "Hei vang hian duhthusamin tui kan inpe thei meuh tawh lo. Thu leh awm hma chu tui connection pek tawh rih loh tur a ni," a ti.
Vanglaini palai zawhna chhangin PHE chief engineer HC Lalnunzira chuan, tui harsat chhan ber chu tun hnaia electric transformer chhiat avanga hun rei tak a pangngai anga tui an pump theih loh vang a nih thu a sawi.
HC Lalnunzira chuan, tui sem ni khat a khaihlak pawhin ngai awh turin hun a duh rei tih sawiin, "Tun hnaia hun eng emaw chen tui sem a khaihlak avangin tui a harsa chho a ni. Ngai awh leh tur chuan hun a duh rei," a ti.
Tlawng luiah duh khawp tui pump tur a awm thu sawiin PHE CE chuan, "Tuna kan khawlte pump chhuah theih chin ang pump tur chu a la awm reng," a ti a; tui connection nei sate pawh an duh anga pek theih a nih loh avangin a thar lâk rih loh turin thutlukna siam a nih thu a sawi a ni.
Aizawl khawpui chawmtu Tlawng lui aṭanga tui pump chhuahna khawl chu electric transformer a chhiat avangin February 23- March 13 chhung a hman theih loh a, Aizawl khawpui tui sem a khaihlak a, tun thlengin ngai a la awh lo.
Assembly Session neih zawh takah khan PHE changtu deputy chief minister Tawnluia chuan, ruahtui tlak lohna a rei tawh a, Mizoram hmun hrang hranga tui laknaah tui a tlem tawh a, Aizawl khawpui pawhin tuiah harsatna a tawk a, chuti chung chuan sorkarin theihtawp a chhuah reng thu a lo sawi tawh a ni.
Tunlaiin Aizawl khawpuiah tui a vang hle a, lirtheia tui zuarte an lûnin tui lei tur tan pawh nghah an ngai a; tui man pawh hi tun hnaiah nasa takin a pung chho mek a, kumin kum tir lama tui litre 2000 man Rs 800 ni ṭhin chu Rs 1,300 leh a aia sangtein an pung tawh a ni.
Vanglaini zawhna chhangin tui zuarte chuan, "Tun hmaa kan tui chawinaah tui a kang nasa tawh a, hla tak takah tui chawi a ngai a, chumi piah lamah diesel man a pung zel bawk si a, chuvangin tui man hi a sang lo thei lo a ni," tiin an sawi.