KHAWTHLIR
Covid-19 sawiho
Chief minister Zoramthanga hoin nimin khan sorkar hotute'n Covid-19 thawh hnihna laka mipui himna tur leh hmalak dan turte an sawiho. Covid-19 thawh hnihna chu a hmasa aiin a thawk na zawk a, mipui mimirah an inkài darh tawha a lan thu an sawi a, "Uar zawka swab sample test kalpui a ṭul," an ti. Thawktu indaih lohna phuhrûk tura volunteer worker lak chungchang leh PPE leh test kit mamawhte an sawiho bawk. Ṭhutkhawmah hian Health minister Dr R Lalthangliana, Health & Family Welfare Board vice chairman Dr ZR Thiamsanga, Finance secretary Vanlalchhuanga leh Health department officer-te an tel a ni.
Vawk phùmna tur
Aizawl mayor Lalrinenga Sailo hoin nimin khan a pisaah sorkar hotute'n Aizawl Municipal Council huam chhunga vawk hri avanga thite phùmna tur an sawiho. Hri vanga vawk thite phùmna tur atan Tuirial, Luangmual leh Hualngohmuna AMC ram neihte an ruahman. Ṭhutkhawma tarlan danin, tun hnaiah Edenthar Vengah vawk 73 leh Armed Vengah vawk 42 a thi tawh a ni.
AH&Vety telh
Aizawl DC Lalhriatzuali Ralte chuan, Aizawl khawpuia zana páwn lama chhuah khapnain a huam loh tur zingah Animal Husbandary & Veterinary department-a vawk hri léng buaipuitute telh thar a nih thu a puang. Curfew laia chhuah phalna (curfew pass) dil duh tan 'curfewpass.ssdd.in' ah dil theih a nih thu a tarlang bawk.
Vawk hri zirho
Nimin khan Siaha DVO pisaah DVO Dr Shahlu Khaila kaihhruaiin 'Awareness campaign on transboundary animal diseases' buatsaih a ni a, tun hnaia vawk hri léng mek chungchang inzirtirin, hri léng laka Siaha district a him theih nan department leh vawk vulhtute ṭan rual a pawimawh thu an sawi. Training-ah hian piggery society member 50 vel an tel a ni.
Internet Centre
Mizoram State Library Internet Center chu nimin khan Art & Culture director R Hmingthanzuala'n a hawng. State Library-ah hian lehkhabu 68,673 awmin, kum 2020 khan mi 1,577 in an tlawh.