Mizoramah oil & gas lak chhuah tham hmu lo

Mizoram hmun hrang hranga tuialhthei (oil) leh gas zawn hna thawktu company-te'n duh khawp an la hmu chhuak lo. Hetih lai hian, Mizorama oil leh gas an zawn theihna licence a thara dil turin hmalak mek a ni.

Vanglaini palai zawhna chhángin Geology & Mineral Resources (GMR) department hotute chuan, Mizorama oil leh gas zawngtu Oil & Natural Gas Corporation (ONGC) leh Oil India Ltd. (OIL)-te chuan oil leh gas lak chhuaha hralh tham an la hmuh chhuah loh thu an sawi.

GMR department hotute sawi danin, ONGC hian kum 2003 aṭangin Mizoramah oil leh gas zawn hna an thawk a, sq.km. 2,660 vela zauah Ministry of Petroleum and Natural Gas hnuaia Directorate General of Hydrocarbons (DGH)-in oil/gas khur (exploratory well) pali verh theihna license a pe.

ONGC hian Meidum leh Zanlawnah gas tlemtê an hmu a, mahse hman tura lâk chhuah tham a awm lo. Hortoki ramah lei verh leh tur an la nei a, mahse, km. 30 vel kawng sial chawp a ngai a ni.

GMR hotute chuan, "Tlang kawngah an bungraw rit ho phurh a rem loh avangin kawng sial chawp a ngai a, an hmu chhuak ngei dawn em tih a hriat loh avangin tàwpsan mai an tum tawh. Chief Minister-in zawng leh ngei se a duh avangin tunah hian PWD-in Meidum-Hortoki kawng an lài mek a, km. 10 vel an lai tawh," an ti a; an license tàwp tawh pawh dil thar leh tura hmalak a nih thu an sawi.

OIL chuan May 22, 2007 aṭangin oil leh gas zawn hna an thawk a, sq.km. 3,619 vela zaua khur panga verh tur an neih zinga pali an verh tawh. Maubuangah lâk chhuah tham loh tlemtê an hmu a, a bak zawngah oil leh gas hmuh chhuah an nei lo. Pangzawl ramah lei verh leh tur hual an la nei a, an license a tàwp dawn hnaih avangin hna an thawk chhunzawm rih lo.

GMR hotute chuam, ONGC license neih chu July 2020 khan a tàwp tawh tih sawiin, "OIL-te pawhin May 21, 2021 thleng chauh hun an nei tawh a, an pahnih hian DGH-in Mizorama lei an verh theih tura a bituk zat aṭanga pakhat ve ve an la verh loh avangin Chief Minister-in an license pawhsei emaw, an thawh tur an thawh zawh theih nan kum hnih tal hun pek belh emaw turin ministry-ah a dilsak dawn," an ti a; CM hminga lehkha thawn tur chu department-in an duang a, CMO-ah an thawn tawh tih an sawi a ni.