Lockdown ngaihtuah uluk a ngai - Dr ZR Thiamsanga

Covid-19 Medical Operational Team chairman Dr ZR Thiam­sanga, MLA chuan, inkhàrkhip (lockdown) puan a nih dawn chuan ngaihtuahna uluk taka hman a ṭul thu a sawi.

Covid-19 vei tun hnaia an pun leh avangin damdawi lama thiamna neite'n lockdown kalpui ṭha an tih leh tih loh zawhna chhangin Dr ZR Thiamsanga chuan, "Ngaihtuahna uluk taka hman a ngai. Lockdown lam hi kan la ngaihtuah thleng pha lo deuh. A chhan chu a hautak si a, kan economy kan ngaihtuah lo thei lo," a ti.

Medical Operational Team Chairman chuan, tlema boruak ngaih­chàn leh deuh ṭha a tih thu sawiin, "Theih­tawp chhuah a, inkhuahkhirhnate khauh deuh zawka kalpui leh phawt ni se," a ti a; economy ngaihtuah ngai mah se, lockdown puan loh theih loh hun erawh thleng thei a nih thu a sawi.