Fire Service Day / Martyrs Day hmang

Fire & Emergency Services chuan nimin khan Fire Service Day / Martyrs Day pualin Mizoram hmun hrang hrangah hun an hmang a, Fire Service Week hman ṭan nghal a ni.

Mizoram sorkar ruahman angin sorkar pisa hrang hrangah Fire Service Week puala thuchah chhiar chhuah a ni a; kumina Week thupui chu 'Kângmei chhuah thulhah kâng ṭhelhna hmanrua nena lo inrálrin lâwk hi kan himna a ni' tih a ni.

Kâng ṭhelhna lama thi, martarte sûnna hunah hian nikum 2020 chhunga India rama kâng ṭhelhnaa thi mi 11-te hming chhiar chhuah a ni a; anmahni sûn nan minute khat ngawi renga dingin hun hman a ni bawk.

Department/office hrang hrangah Fire Service Week puala thuchah chhiar a ni a, bookmark siamin, fire station-te telephone number tarlan a ni. April 17, Inrinni zingah Week pualin Cycle Rally buatsaih a ni dawn a; Week puala high school zirlaite tana Essay Writing Competition buatsaih lawmman April 20-ah sem a ni ang.

Fire Service Day hi April 14, 1944-a Mumbai lawng chawlh hmuna indo lawng lian Fort Stikine kânga thi mi 77 thite hriatrengna atan hman ṭhin niin, April 14-20 chhung hman ṭhin a ni a; Week chhungin India rama fire service hrang hrangte'n kângmei laka himna tur inzirtirna an buatsaih ṭhin. Fort Stikine kângah hian Bombay Fire Brigade mi 66 leh Bombay Salvage Corps mi 11 an kâng hlum a ni.