Sakhaw himna tur ngaihtuaha vote Thlâk turin Serchhip bial mipui chah

MPCC Campaign Committee chairman Lal Thanzara leh Congress party-a hruaitu dangte'n nimin khan Serchhip Press Club-ah thuthar thehdarhtute an kâwm a; politics therhlo ngaihtuah lo a, sakhaw himna tur ngaihtuaha ṭawngṭaina nena vote thlak turin mipui an chah.

Lal Thanzara chuan, BJP-in an tum ber chu Hindu lalram siam a nia sawiin, "CAA leh policy dang tam tak an kalpui mek. Mizoram chu Kristian state a nih avangin harsatna kan tâwk lo mai thei, mahse, India ram hmun hrang hrangah Kristiante'n an tuar nasa hle," a ti a; Mizoramah pawh ram dang aṭanga Kristiante ṭanpuina tur lo lut tur thlengin kan tuar mek tih a sawi.

Kristiante awp bettu BJP chu Mizorama rorel lai mek MNF nen an inzawm tlat tih sawiin Lal Thanzara chuan, "Kan ram leh hnam hi a him lo tak zet a ni. Chuvangin, politics therhlo mai mai ngaihtuah lo a, kan sakhaw himna tur a hawlh pha a ni tih hriaa ṭawngṭaina nena vote kan thlak a ngai a ni," a ti.

MPCC Campaign Committee Chairman chuan, politics chu dâwt hmanga inkaihhruaina tur a ni lo tih sawiin, "MNF hi kum 10 an sorkar tawh a, tunah an sorkar leh mek a, chuti chung chuan an thutiam tihhlawhtlin an nei mang lo. Mizoramin sum leh páia harsatna nasa tak a tawh mekte hi sum leh pai enkawlna kawnga an hlawhchham vang a ni," a ti a; by-election-ah MNF candidate a tlin chuan Mizoramin hmasawnna kawng a zawh theih dawn loh thu a sawi.

Lalduhoma chung­chang sawiin Thanzara chuan, "House-a thu sawi tur chuan a ṭha, mahse, Serchhip bial tana hmasawnna hna hâi chhuak tur chuan a ṭhat loh ber ka ring. MNF-in an huat êm avangin, a tling a nih pawhin an hrêk char char dawn a, Serchhip mipui tan awmzia a awm lo ang," a ti.

Lal Thanzara chuan, ZPM thupui chu kalphung thar a nih laiin, Lalduhoma chu Mizorama political party zawng zawngin an enchhin vek tawh niin a sawi a, "Tunah hian tling ta se, ZPM-ah a awm reng ang em tih hriatthiam har tak a ni," a ti a; a thlavâng ZPM thláwptu MLA-te'n an hauh lo niin a sawi.

Congress party candi­date PC Laltlansanga pawhin thu sawiin, amah vote turin bial mipui a ngen a, "Serchhip bial mipui hian district capital dangte ang bawkin bial chhung mi ngei MLA kan neih a ṭul tawh hle a ni," a ti.