Lalduhoma hnathawh hmuhsaka Thlang tling leh turin mipui ngen

ZPM party hruaitute chuan nimin khan Serchhip Press Club-ah thuthar thehdarhtute an kâwm a; Lalduhoma'n kum khat leh a chanve a enkawl chhungin MLA fund hmanga Serchhip biala hna a thawhte hmuh tur a tam thu sawiin, hna a thawh chhunzawm theih nan thlang tling leh turin mipui an ngen.

ZPM vice president K Sapdanga chuan, tun ṭuma by-election chu a danglam hle tih sawiin, Serchhip bial mipuiin kum nga chhung an bial enkawl tura an thlan Lalduhoma'n kum khat leh a chanve chauh mipui rawngbáwl hman mah se, MLA fund hmanga bial chhunga hna a thawhte hawina lam apiangah hmuh tur a awm tih a sawi a, "Serchhip bial hi MLA fund hmang ṭha ber, hmang daihzâi ber zinga chhiar ngam a ni," a ti.

Lalduhoma'n hun rei lo te chhunga a biala hna a thawhte chu a chhuan­awm hle tih sawiin Sapdanga chuan, "A thawk­tu hi opposition MLA a ni ngei mai, a chhawr­tute chu ruling mi te, páwl dang mi te, neutral-te an ni. Chutiang chu a lawm ZPM-in kan aupui 'Kalphung thar, mipui sorkar' chu," a ti. ZPM MLA-te bialah MLA fund hmanga siam vantlang ro hlu a tam bik zel thu a sawi.

K Sapdanga chuan, "By-election dangah chuan ruling party-in huháng chak tak an nei ṭhin a, eptu party-te'n chuh ve bawk mah se, ruling party an papêk deuh ṭhin. Tun ṭumah chuan ruling party leh eptu party inepna záwngin a kal mang lo," a ti.

Sapdanga chuan, "Pu Lalduhoma nghaisak a nih dan kha party inepna vang mah ni se, Kristian sakhaw zuitu, kohhrana rawngbawltute inkara thil thleng zui zel atan a inhmeh em? Mizo leh Mizo kut inthlak dan atan awm kan ti em, tih hi thu inchuh lian ber a ni," a ti a, Lalduhoma kutthlak a nih danin boruak a neih len ber thu a sawi.

By-election neih turah sum leh therhlo, ruih theih thil, hmanraw chhe ber berte chu party hrang hrangin an leklam rih lo nia an hriat thu sawiin Sapdanga chuan, "Politics khelh dan bung thar kan kái thei mai dawnin a lang. Hmabak hi ni thum chauh a ni tawh a, hmanraw bawlhhlawh hmang lo tluan turin party dangte kan sáwm a ni," a ti a; Serchhip bial mipuite chu thlêmna an tâwk palh a nih pawhin, tuar chhuak hram turin a ngen nghal.

ZPM Vice President chuan, ram hmasawnna hna thawh tak tak dawn chuan ruling bial chu tehfung a ni ngai lo tih sawiin, "Hmun remchang zawn a ngai tho zel. CM bial nih vang ngawtin Tuirial khuaah college a din theih loh. Ramin dan a nei a, tih dan a awm bawk a, chu chu a pawimawh. Pathian leh mipui zarah ZPM-in thuneihna a chan ve hunah chuan 'Rule of Law' ngaih pawimawh ber a ni ang, 'Rule of Lie' ni loin," a ti.

K Sapdanga chuan, Serchhip biala by-election awm turah candidate-te an ṭha tláng hle tih sawiin, "An vaiin an kal tawhna lama hotu lu ber nih tling, ram pum hriat rawn tling an ni," a ti a; ZPM candidate Lalduhoma'n kum khat leh a chanve lek chhunga Serchhip biala hmasawnna hna a thawh tawhte chu hmuhsak a, a thawh chhunzawm theih nan thlagn tling leh turin Serchhip bial mipui a ngen a ni.