BJP candidate thlang turin mipui ngen

BJP star campaigner Jitendra Singh, DoNER minister ni bawk chuan PM Narendra Modi kaihhruaina hnuaiah Mizoramah nasa takin hmasawnna a awm nia sawiin, BJP candidate Lalhriatrenga Chhangte thlang tling turin mipui a ngen.

Jitendra Singh hian April 13, Thawhlehni leh nimin khan Serchhip bial by-election neih tur pualin Serchhip leh Thenzawla inkhawmah thu a sawi a; BJP chu party danglam bik an ni sawiin, "Kan thupui, mi tinin rualkhaiin hmasawnna an mamawh ang an hmu tur a ni, tih a ni," a ti.

India ramah Congress party-in hun rei tak sorkarna an chang tih sawiin Jitendra Singh chuan, "Mizoramah hmasawnna an thlentir duh lo a, a chhan chu Mizoram mipui nuai 10 vel an ni a, MP pakhat chiah an nei a, Central-ah sorkarna siam turin ṭangkaina in nei lo tih an hriat vang a ni," a ti a; tuna BJP-in Mizoram tana hmasawnna an thawh ang chu Congress sorkarin an ti duh lo niin a sawi.

Mizoram chhim lama lawng chawlhna tur te, rél kawng chhim lam thlenga kalna tur te, Tuirial Hydel Project-te leh hmasawnna lian tak tak Mizorama thawhte chu BJP sorkar hnuaia tih vek a nia sawiin Jitendra chuan, "Hriata Chhangte-in Serchhip bial tana a duh a rawn thlente kan tihlawhtling ang tih Model Code of Conduct-in min phuar avangin ka tiam thei rih lo che u a, mahse, in thlang tling a nih chuan inthlan zawhah ka dawhkanah kan sawi dun dawn a ni," a ti.

BJP candidate Lalhriatrenga Chhangte pawhin thu sawiin, chief minister Zoramthanga aiin Narendra Modi-a'n Mizoram a hmangaih zawk niin a sawi a, "BJP chuan hmasawnna kan mamawh tinréng min pek an duh a, a kalkawng atan erawh rin ngam a neih loh avangin hmarchhak state dangte hmasawnna ang kan nei ve rih lo mai a ni," a ti a; Serchhip biala hmasawnna thlen turin BJP an pawimawh hle niin a sawi.

Lalhriatrenga Chhangte chuan, Serchhip biala hmasawnna thlen turin a ding tih sawiin, "Serchhip bial hmasawnna tura ka dream tihhlawhtlin a nih theih nan in vote hlu tak min pe ṭheuh turin Serchhip bial mipuite in khawngaihna ka rawn dil a ni," a ti.