Peace Bonus kha Pu Zoramthanga Dil chhuah a ni - Robert Romawia

MNF adviser Robert Romawia Royte chuan nimin khan Aijal Club-ah thuthar thehdarhtute a kâwm a; Peace Bonus chu chief minister Zoramthanga dil vang liau liaua hmuh a nih thu a sawi.

Robert Romawia Royte chuan, Lalduhoma'n Assembly House-ah, kum 2000-a Mizoram sorkarin Peace Bonus cheng vbc. 182.50 a hmuh chu NLCPR fund, state dangte pawhin an hmuh ve tho ang a nih thu a sawi tih tarlangin, "Hei hi thu dik lo hul hual a ni. Peace Bonus sum kha Pu Zoramthanga’n a bik liau liaua a dil chhuah a ni a, NLCPR fund ni loin, Finance Ministry-in a sanction a ni," a ti.

Kum 2000 hma lamah Peace Bonus hriat a nih ngai loh thu sawiin Robert Romawia chuan, "Khatih laia CM Pu Zoramthanga’n a ngaihtuah chhuah leh a rawtna angin Ministry of Finance chuan kum 2000 khan Mizoram sorkar hnenah cheng vbc. 182.50 a pe a ni," a ti a, Peace Bonus chu sorkar laipuiin a bika Mizoram tana an ngaihtuah a ni a, NLCPR fund a nih loh thu a sawi.

MNF Adviser-in document a sem, Finance department-in RTI Act hmanga zawhna an chhannaah chuan, 'He Peace Bonus cheng vbc. 180 hi Finance Ministry hnuaia committee-in Mizoram sum harsatna sutkianna atana rawtna a pek zûlzuia Prime Minister-in NE India-a CM leh Governor-te meeting Shillong-a January ni 21-22, 2000-a neiha a puan a ni,' tih a ni.

Robert Romawia chuan Serchhipa Paragliding Centre chungchang sawiin, "Mizoram Aero-Sports Association (MASA) ṭhahnemngaihna leh bul ṭannain CM hoin Tourism department-in a ṭul tinréng kan buaipui a, MASA DPR siam chu June 2019 khan CM thu angin Tourism department-in NEC-ah kan ûm zui a, PWD puihnain counter-signing pawh kan la ni," a ti.

Paragliding Centre atan cheng nuai 488.81 NEC-in a pe tawh tih sawiin Robert Romawia chuan, "MASA-ah cheng nuai 468.81 a lut ang a, a bak cheng nuai 20 chu Tourism department-ah a lut thung," a ti a, Mizoram sorkarin cheng nuai 124.44 a sèn tawh thu a sawi.