MNF candidate Vanlalzawma a ṭha ber - Lalruatkima

MNF adviser Lalruat­kima chuan nimin khan Serchhip Press Club-ah thuthar thehdarhtute a kâwm a; April 17, Inrin­nia Serchhip biala Assem­bly by-election neih turah MNF candidate Vanlal­zawma chu a ṭha ber tih sawiin, vote turin mipui a ngen.

Lalruatkima chuan, opposition MLA ai chuan ruling MLA neih a ṭha zawk nia sawiin, "Opposition MLA-in MLA fund leh tih theih neuh neuh nei ve mah se, sorkar chakna nen bial hmasawnna tura hma la thei tur ruling MLA neih a ṭha zawk hle a ni," a ti a; ruling MLA neih tum turin bial mipui a chah.

MNF kaihhruai sor­kar­in kawng ṭha leh ni tin mamawh hrang hrangte awlsam zawkin mipui tan a siam nia sawiin Lalruatkima chuan, "Covid-19 hripui léng karah kan mamawh tlang­pui min phuhrûk thei zel hi kan vannei tak zet a ni," a ti a; kum hnih MNF sorkar tawh chhungin mipui khawsak awlsamna tur tam tak an tihhlawhtlin tawh thu a sawi.

Covid-19 laka invênna kawnga sorkar, kohhran leh pawl hrang hrangte'n pheikhai rual taka hma an lak avangin tawrhna a ziaawm nia sawiin Lalruatkima chuan, Covid-19 donaah sorkar hmalakna thláwp zel turin mipui a ngen. MNF Adviser chuan, Serchhip bial hmasawnna thlen turin tu nge ṭha ber ang tih ngaihtuah chunga vote thlak turin mipui a ngen a, "Kan candidate Pu Vanlalzawma hi a fel bikin a ṭha bik e, kan ti ngawt lo a, Serchhip biala hmasawnna hna thawh mekte chak zawka chhunzawm a, hmachhawp tam tak awmte hlen chhuak turin Pu Vanlalzawma hi a remchangin a ṭha ber a ni," a ti.

Lalruatkima chuan, MNF chuan by-election felfai leh thianghlim neih an duh tih sawiin, Election-a mawhphurtute leh MPF hmalakna ṭawiawm zel turin party dangte thawhpuiah an sawm tih a sawi bawk.