Mizorama MP inthlan hun April 11

Election Commission of India (ECI) chuan, nimin khan Lok Sabha 17-na inthlan hun chu an puang. Inthlan hi phase pasariha kalpui a ni dawn a, Mizoram chu Phase-I ah awmin, April 11, 2019-ah inthlan a ni ang. May 23, 2019-ah India ram puma vote tlate chhiar a ni ang.

Lok Sabha inthlan hun hi chief election commissioner (CEC) Sunil Arora chuan a puang a, inthlan lo awm tur atana ruahmanna hrang hrang an neihte a sawi lang nghal. CEC chuan, inthlan puan a nih aṭangin Election Model Code of Conduct hman ṭan nghal a nih thu a sawi a, "State hrang hranga MLA seat ruak atan pawh by-election neih nghal tur a ni," a ti.

Lok Sabha inthlan hi Phase-I chu April 11-ah neih a ni dawn a, Phase-II chu April 18-ah, Phase-III chu April 23-ah, Phase-IV chu April 29-ah, Phase-V chu May 4-ah, Phase-VI chu May 12 leh Phase-VII chu May 19-ah neih a ni dawn.

Tun ṭum Lok Sabha inthlan atan hian vote nei mi nuai 9000 vel an awm a, Lok Sabha inthlan hmasa aiin nuai 840-in voter an tam. Polling station zawng zawngah VVPAT hman a ni ang a, a vawi khatna atan EVM-ah candidate-te thlalak tarlan a ni dawn. Inthlan atan hian polling station nuai 10 siam a ni dawn a, kum 2014-a inthlan aiin nuai khatin a tam zawk dawn a ni.

Bihar, Uttar Pradesh leh West Bengal-ah inthlan hi thawh sarihah neih a ni dawn a, Jammu & Kashmir-ah thawh ngaa neih a ni ang. Jharkhand, Madhya Pradesh, Maharashtra leh Odisha-ah thawh li-in neih a ni dawn a, Assam leh Chhattigarh-ah thawh thuma neih tur niin, Karnataka, Manipur, Rajasthan leh Tripura-ah thawh hniha neih a ni ang. Heng bak state dang zawngah chuan inthlan hi thawh khata zawh nghal tur a ni.

June 3, 2019-a tawp tur Lok Sabha 16-naah hian seat 545 aṭangin ruat seat pahnih tiam lohin, seat 543-ah BJP-in seat 282 an chang a, party malin sorkar an siam thei. BJP hian an thawhpuite nen National Democratic Alliance (NDA) dinin, seat 336 an nei a ni.

Nizan khan Mizoram chief electoral officer (CEO) Ashish Kundra pawhin thuthar thehdarhtute a kâwm nghal a; Lok Sabha MP inthlan neih tur chungchang a hrilhfiah.

Ashish Kundra chuan CEC-in state hrang hranga MLA seat ruak hnawhkhahna atan Lok Sabha inthlan rualin by-election neih a nih tur thu a puang tih sawiin, "Notification erawh min la thawn lo, min rawn thawn vat kan ring," a ti.

CEO sawi danin, tun dinhmunah Mizoramah voters mi nuai 7.84 an awm. Inthlan atan hian polling station 1175 siam a ni dawn a, counting hall leh strong room 20 ve ve a awm ang. Polling station 10% chu hmeichhe hlang duty-na tur a ni dawn a ni.

Asish Kundra chuan election model code of conduct puan nghal a nih thu sawiin, code of conduct hi ṭha taka zawm a nih theihna atan political party-te thawhpuiah a sawm.

Phase-I inthlang tur Mizoram leh state dang 20 atan March 18, 2019-ah notification chhuah a ni ang a, nomination thehlut duh tan March 25 thleng hun hawn a ni ang. Inhnûkdâwk duhte tan March 28 thlen hun hawn a ni dawn a; vote tlate chu India ram pumah a rualin May 23-ah chhiar tur a ni.