Aizawla Assam Rifles hmuna LSC-te a rang lama ṭhiah rêl

Chief minister Zoramthanga hoa Council of Minister-te March 8, Zirtawpnia ṭhukhawm chuan, Aizawl khawpui lailía Assam Rifles rama dan loa LSC pek tawhte chu a rang lama ṭhiah (cancel) an rél.

Meeting-ah hian, May 31, 2019 hmaa Assam Rifles-te Aizawla an ram luah chhuahsan tura notification siam chu bawhzui mek zel a nih thu tarlan a ni a; mimal ṭhenkhat hnena dan palzûta LSC lo pek tawhte chu dan anga cancel tura a rang lama hmalak turin thutlukna an siam.

Mizoram Vehicle Taxation (Amendment) Bill, 2019 pawh Cabinet chuan an pass a; road tax, kum 15 chhung atan chauha pek theih ṭhin chu tihtawp a ni a, mipuite'n kum 5, 10 leh 15-ahte an duh an thlang thei tawh ang.

Sinlung Hills Council an inthlan thuai theihna atana ruahmanna, 'Delimitation of the Area of Sinlung Hills Council and its Con­stituencies' chu pawm a ni.

Puantah (handloom) leh thiamhnáng deh (handicraft) chu Mizo hnam ziaráng phochhuaktu pawimawh a nih avangin Mizoram sorkarin chawi sâng tura hma a lak meknaah, ZOHANDO tihtawp tura order siam tawh chu tihnun leh tura rel a ni a; kutthemthiamte leh puantah lama eizawngte'n an samkhai phah theih nan ZOHANDCO chu facilitator atan a pawm a ni.