Larsap thar Prof. Mukhi

Mizoram Governor atan March 9, Inrinni khan Raj Bhavan-ah Assam Governor ni lai Prof. Jagdish Mukhi chu Gauhati High Court judge Justice Nelson Sailo chuan rinawmna thu tiamtirin a la lut. Governor aṭanga báng ta Kummanam Rajasekharan chuan Inrinni vêk khan Mizoram a chhuahsan.

Prof. Jagdish Mukhi hian Mizoram Governor nghet ruat a nih hma chuan Assam Larsap ni chungin Mizoram Governor hna a chelh dawn a, Mizoram Governor 19-na a ni. Larsap thar hian Inrinni vêk khan Assam a pan leh nghal a, vawiin hian Mizoramah a rawn kîr leh ang. Vawiin tlaiah Lokayukta chairman atan C Lalsawta, IAS (Rtd.) a la lut dawn a, naktukah Assembly budget session ṭannaah thu a sawi ang.

Governor thar lak luhnaah hian chief minister Zoramthanga, Assembly speaker Lalrinliana Sailo, minister te, MLA-te leh sorkar official eng emaw zat an tel a ni. Lak luh a nih hnua thuthar thehdarhtute a kawmnaa Prof. Jagdish Mukhi chuan, India danpui-in Governor tih tura a ruatte ṭha taka a tih dawn thu a sawi.

Vanglaini palai zawhna chhangin Governor chuan, Mizoram Larsap atana ruat a nihna chu nimin lawk a nih avangin, Governor a nih chhunga a ngaih pawimawh tura thutlukna a la siam loh thu a sawi a; chutih rualin, Mizorama district khawpui zawng zawng tlawh a tum thu a sawi.

Larsap chuan, thla 10 chhung Assam Governor a nih chhungin district zawng zawng a tlawh kim tawh thu a sawi a, "NGO hruaitute leh sorkar official-te ka kâwm a, an district dinhmun leh mamawhte ka zâwt chiang a ni. Damdawi-in leh zirna-inte pawh sawi lâwk loin ka tlawh thut ṭhin a, chu chuan an dinhmun min hriat chiantir ṭhin," a ti.