RK Lianzuala vui liam a ni ta

Mizorama media rawngbawlna lama thawh hlâwk tak, RK Lianzuala (53), Zonet Cable TV managing director chu March 9, Inrinni chhun dar 11:15 khan chaw kawng cancer vangin a thi a, nimin khan Bethlehem Veng thlanmualah vui liam a ni.

RK Lianzuala hi Sawichhunga (L) leh Lianmawii (L) te fa pasa­rih zinga a naupang ber niin, May 29, 1966-ah Champhaiah a piang. Tabith Laltlanchhungi nen inneii fa pahnih - Lalhruaitluanga leh Hmangaihzuali an nei.

Lehkha thiam thei tak niin HSLC-ah Mizoram pumah pahnihna a ni a, BA (Sociology) chu kum 1987-ah pass in, gold medalist a ni a, kum 1989-ah M.A (Public Administration) pass lehin, NEHU-ah gold medalist a ni leh bawk.

St. Pauls H/S-ah a thawk a, zirtirtu ni chungin kum 1991 aṭangin All India Radio, Aizawlah chanchin thar chhiartu leh letlingtu a ni. April 1992 aṭangin Mizoram sorkara Printing & Stationary department-ah editor hna a thawk a, AIR-ah a thawk tel zel a; November 1996 aṭangin AIR, Aizawlah deputation-a kalin, assistant news editor hna a thawk.

AIR-a a thawh lai hian Thompson Foundation, Britain-ah Diploma in Broadcast Journalism a zir a zo a ni.

Sorkar hna a thawh chu bànsanin, November 2004-ah a ṭhiante nen Zonet Cable TV an din a; Zonet-ah hian a khaipa ber niin hun pumin a thawk a ni.

RK Lianzuala hi Bethlehem Presbyterian kohhranah rawng-bawltu pawimawh tak a ni. KṬP-ah branch leh bialah office bearer post a chelh kim tawh a; kum 25 a nih lai, 1992-ah Central KṬP Committee-ah telin, 1996 thleng a awm a, kum 1994-96 chhung assistant secretary a ni a; Kristian Ṭhalaiah joint editor a ni bawk.

Kum 1992–94 chhung Presby­terian Youth Fellowship (PYF) Committee member a ni a, kum 1994–96 chhung assistant secretary leh kum 1996–98 chhung secretary a ni.

Bible Society, Aizawl Auxiliary Youth-ah secretary leh vice president a ni tawh a, Council for World Mission-ah kum 1999-2001 chhung Council member a ni. Kuminah hian Bethlehem Kohhranah thuhriltu, sunday school zirtirtu, Kohhran Pavalai Pawlah vice chairman a ni mek.

RK Lianzuala hian chaw kawng cancer a nei a ni tih February 6, 2018 khan hriat a ni a, Christian Medical College, Vellore leh Aizawlahte an inenkawl.

March 8, Zirtawpni zan khan a nat zual avangin Ebenezer Hospital-ah hruai niin, ICU-ah enkawl nghal a ni a, a natna tuar loin March 9 chhun khan a thi ta a ni.