KHAWTHLIR

Special Clinic
Mizorama doctor pawl pathum - Indian Medical Association (IMA), Mizoram Govt. Doctors Association (MGDA) leh Indian Dental Association (IDA)-te chuan 'Mipui hrisel nan - Zoram dung leh vâng fang chhuakin' tih thupui an kalpui mek hnuaiah hmun kilkhawra mi harsa zawkte tan special clinic an nei ṭhin a, March 7-8, 2019 chhung khan Sakawrdai leh chhehvelah an buatsaih chhunzawm. He hunah doctor 29-in mi 2,392-te hriselna dinhmun an enfiahsak a, a thlawnin damdawi an pe nghal a ni.

Thisen pe
Khatla North Branch KṬP chuan Inrinni khan an Kohhran Hall-ah blood donation camp an huaihawt a, Synod Hospital tan thisen unit 21 an pe a, petute hi mipa vek an ni.

Silai tun tur
Lunglei DC K Lalrinzuali chuan thupek chhuahin, Lok Sabha inthlanpui lo awm turah inthlanna muanawm leh felfai tak a awm theihna atan Lunglei district chhunga silai nei zawng zawngte chu an awmna police station hnai bera silai tung turin a hriattir. Silaite chu March 22, 2019 ral hmain polioce station/outpost-ah tun/thehluh tur a ni.

MLA-in enfiah
Inrinni khan Aizawl West-II bialtu MLA Lalruatkima, minister of state chuan a bial chhung, Tuikual South-a Kaisara Road zauh dan tur a enfiah a, Tuikual South khawtlang hruaitute'n an ṭawiawm. Kaisara Road hian Dinthar kâwn a pawh a, km. 2 vela thui a ni.

Exhibition buatsaih
NABARD Mizoram Regional Office chuan March 9, Inrinni khan Vanapa Hall-ah NAB-Zo Kutchhuak Exhibition an buatsaih a, Reserve Bank of India general manager Mary Deng-in a hawng. Exhibition-ah hian Mizoram hmun hrang hranga self help group (SHG) leh joint liability group (JLG)-te kutchhuak thil chi hrang hrang, kut themthiamna leh puantahte pho chhuahna a ni a, Mizoram Cooperative Apex Bank Ltd.-in hmun hrang hranga mi 30 chuangte thil siamte an pho chhuak bawk.