Written exam neih tawh a nihna anga kaltlangpui turin ZPM-in sorkar an phût

ZPM chuan thuchhuah siamin, Social Welfare department-in Poshan Abhiyan project hnuaia hna (post) 22 thawk tur laknaah, written test paltlang lo mi 20 lak tum vangin dik taka tlingte exam neih tawh leh result tihchhuah tawh chu an sût (cancel) niin a tarlang a; written test neih tawh chu a nihna anga kaltlangpui turin sorkar an phût.

ZPM chuan, Poshan Abhiyaan project-a thawk tur lakna tura written exam-ah mi 54 an tling tih sawiin, "Written exam result leh computer test exam an neih tawh chu written-a tling lo mi 20 hming lo langte vangin exam beitute'n nnasa takin an sawisel a, exam neih tawh zawng zawng chu cancel leh vek in, a thara exam nei leh turin thuchhuah siam a ni," an ti.

ZPM tarlan danin, Poshan Abhiyaan project hnuaia thawktu lak turte chu - district coordinator pathum, district project assistant pathum, block coordinator pariat, block project assistant pariatte a ni a, a vaiin post 22 a ni. Hna diltute chu February 9, 2019-ah written exam neihpui niin, February 14-ah result a chhuak a, mi 54 an tling.

Written exam-a tling mi 54-te chu NIELIT, Zuangtuiah computer test nei tura hriattir an ni a, a hnuah computer test neih hun tura ruat February 19 chu chhan eng emaw vangin cancel niin, February 23-ah exam tura tih a ni. Written exam-ah mi 54 an tlin laiin, February 23-a computer exam tura tihah chuan mi 74 an ni tawh a, mi 20-in an pung.

Written exam-a tling lo chunga computer exam tura koh tel mi 20-te chu computer test bakah, interview tura koh tel an ni a; chutia an pun tâk vak avang chuan thil dik lo a awm tih hriain sawiselna a nasa a, interview tura hun ruat February 25 pawh an ṭhulh (cancel) zui ta a ni.

March 8, 2019-ah notification tihchhuah niin, ZONET Cable TV leh Doordarshan Kendra, Aizawlah Poshan Abhiyaan project-a thawk tur lakna thil lo tih tawh, written exam leh computer test zawng zawngte chu a vaia cancel a nih thu chhuah a ni.

ZPM chuan, written exam-a tling ve lo mi 20-te vanga written exam paltlang tawh mi 54-te exam result thlenga cancel a ni chu thil mak tak a ni tih an sawi a, "Duhsak zawngte dik lo taka lak tumna vanga hun leh thâ, sum leh pai tam tak sénga dik taka tling exam beitute’n an tuar hi kan dem tak zet a ni," an ti.

ZPM chuan written exam-a tling tawh mi 54-te aṭang ngeiin Poshan Abhiyaan project-a thawk turte chu lak ngei ni se an duh thu an tarlang a; thil dik lo awmte chu March 2019 chhung ngeia chingfel turin sorkar an phût a ni.