Minister Thangtea'n tlawh

Health minister Dr R Lalthangliana chuan Inrinni zing khan Lungleia Mizoram Polytechnic leh Nursing School-te a tlawh a, Lunglei High Powered Committee vice chairman Lawmawma Tochhawng, MLA-in a ṭawiawm.

Higher & Technical Education minister Dr R Lalthangliana hi Mizoram Polytechnic-ah principal B Lalhmuakluaia leh a thawhpuite'n an lo dawngsawng. Minister chuan, Mizoram, khawtlang leh chhungkuaa ṭangkai thei tur zirlai chher chhuah chu SEDP tum a nih thu sawiin, "Polytechnic aṭanga zir chhuakte hi anmahnia intodelh thei tura chher chhuah an ngai," a ti a; thawktute chu hmasawnna ruhrel ṭangkai tak duang chhuak a, ngaihtuahna ṭha tak hmanga zirlaite enkawl turin a chah.

Lawmawma To­chhawng pawhin thu sawiin, "Polytechnic-a zirlaite hi khawtlang leh Mizoram tana mi ṭangkai ni thei khawpa chher chhuah an pawimawh. Sorkar hna piah lamah mahni intodelh thei tura zirtir an ngai a ni," a ti.

Health Minister-in Lunglei Salem Venga Nursing School a tlawhnaah principal T Ro­zami leh a thawhpuite leh zirlaite'n an lo dawngsawng a; school compound leh room hrang hrangte a fang.

Dr R Lalthangliana chuan, Nursing School chu mihring enkawltu tur bik zirna a nih avangin, tihdam rawngbawltu an ni tih hre reng turin zirlaite a chah a; "Nursing School hi MNF hun laia din a ni a, kan tichangkang zel dawn a, thil ṭul angte chu kan ti zel dawn a ni," tiin, Nursing School-in harsatna hrang hrang an lo thlente chu theihtawp chhuaha sutkian a tum thu a sawi.