Kohhran Hmeichhe Inkhawmpui Lian a ṭiak

Mizoram Presbyterian Kohhran Hmeichhe Inkhawmpui Lian vawi 48-na, Kolasib Diakkawn khelmuala neih chu nizan khan a ṭiak a; palaite'n vawiin hian an khua ṭheuh an pan ang.

Inkhawmpuiah hian Inrinni khan Kolasib Diakkawn Kohhran biak-inah rorel inkhawm neih a ni a, Kohhran Hmeichhe chairman K Lalliantluangi;n a kaihruai a, rorel palai mi 919 an kal. Kum 2019-2020 chunga budget atan Rs. 14,50,000 an pawm a, Women Center budget atan Rs. 40,50,000 an pawm bawk.

An thurel dang zingah, kohhran hlutna leh pawimawhna inzirtirna kawnga hmalak te, naupang zinga rawngbawlna ram pum huapa uar zawka neih te, chhiatni/ṭhatni-ah hmeichhiate puanbih inzirtir thar te, kum 2019 chhungin Synod Hospital Charity Fund leh John Williams Hospital, Lunglei pualin inkhawm thawhlawm vawi khat ve ve lâk khawmte a tel.

Kum 2020-a rorel inkhawm neihna atan Ramhlun Venglai biak-in an thlang a, a hun atan March 6-8 an ruat. Kum 2021-a Inkhawmpui Lian neihna atan East Lungdar khua an thlang.

Inrinni chawhnuah kum 2019-2021 chhunga Central Kohhran Hmeichhe hruaitu turte an thlang a; vice chairman-ah Lalrinpuii (Mission Veng) assistant secretary-ah Lalngaihzuali (Chanmari), treasurer-ah Vanlalrovi (Venghlui) leh finance secretary-ah Lalsangluaii, Tuirial te an thlang.

Mizoram Synod-in chairman atan Lalrinkimi leh secretary atan H Lalfakmawii te a ruat a ni. Hmeichhe inkhawmpuiah hian thupui chu 'Tunlai thil awmzia' tih a ni a, speaker Rev.Dr R Vanlaltluanga, Aizawl Theological College-in a sawi ṭhin. Nimin chawhma khan mi 15,804 an inkhawm a, Kristian Chhungkaw dinhmun tehnaa ti ṭhate hnenah lawmman hlan a ni. Nizanah mi sing hnih dawn an inkhawm leh bawk.

Report-a a lan danin, Presbyterian Kohhran Hmeichhiaah hian member 1,76,605 an awm mek a, Presbyterian kohhran mi awm hlangna chhungkua 1,05,558 awmin, kohhran pawl dang nena inawm pawlhna chhungkua 4,620 an awm. Inkhawmpuiah hian palai riak lut mi 9,500 vel an awm a, lehlanga kal ṭhahnem tak an awm bawk a ni.