Aizawlah two wheeler taxi 1,578 a awm

Aizawl khawpuiah two wheeler taxi service lai 1,578 awmin, stand 29 an nei mek a; chawhrualin, ni khatah two wheeler 43 chuang hret (43.5)-in stand pakhat an inṭâwm ang a ni.

Mizoram sorkarin kum 2020 tàwp lam aṭanga Aizawla tlân tur two wheeler taxi permit a pek chhuah ṭhahnem tak zinga 1,080 chu Aizawl Traffic Police-in tlàn (service) phalna an pe tawh a; a hmaa awm tawh sate nen tun dinhmunah two wheeler taxi service lai 1,578 a awm. Chu'ng zinga 1,250 vel chu Aizawl Two Wheeler Taxi Association (ATTA)-ah an inziak lut.

Two wheeler taxi-te chu sticker A, B, C, D leh E pek an ni a, Thawhṭan-ni aṭanga Zirtawpni chhungin sorkar pisa kai ní-ah ni khat ṭheuh tlan loh ní an nei. Inrinniah erawh chuan chawhnu dar 1 hnu lamah an vaiin an tlân thei a, Pathianni leh sorkar chawlh ní (holiday)-ah an vaiin an tlân thei bawk.

Aizawla two wheeler taxi service mek 1,578 chu sticker A, B, C, D leh E indawta ziah luh zel a ni a, chawhrualin, sticker pakhatah taxi 315.6 zel a awm. Ni khatah sticker pakhat zel an chawlh ṭhin avangin chawhrualin ni khatah taxi 1,262.4 an tlân thei a ni.

Aizawl Municipal Corporation chuan an huam chhungah two wheeler taxi stand 29 an siam a, chawhrualin, taxi 43.5-in stand pakhat an inṭâwm ang a ni.

AMC hotute chuan, Aizawla two wheeler taxi stand mamawh belhna an hriatpui thu Vanglaini palai an hrilh a, "Parking Committee-in a ngaihtuah thuai dawn a, siam belh zat tur a la sawi theih loh," an ti a; two wheeler taxi stand indaih lohna an ngaih pawimawh thu an sawi.