Minister-in NSS hnenah chawimawina a hlân

Association for Voluntary Blood Donation (AVBD) Gen.Hqrs-in nikuma Covid-19 léng leh inkhàrkhip vuakveta thisen unit 2,079 petu National Service Scheme (NSS), Mizoram hnena chawimawina an pek chu nimin khan Health minister Dr R Lalthang­liana'n a pisaah a hlân.

Dr R Lalthangliana chuan, Covid-19 léng leh inkhârkhip vanga ramin hun khirh tak a tawh laia State NSS Cell leh NSS volunteer-te inpekna chu chhuanawm a tih thu a sawi a, "Thisen mamawhtute'n an tlakchham lohna tura NSS hotute'n ruahmanna thiam taka an siam hi a ropui a, NSS volunteer tam takin thisen an pe hi a lawmawm tak zet a ni," a ti.

Health Minister chuan, mihring nunah mi dangte tana luan chhuah a, mite ṭanpui aia hlu a awm chuang lo tih sawiin, "Thisen pek hi mi tana kan luan chhuah theihna hlu ber pakhat a ni," a ti a; thisen pek uar zel tura Mizo mipui a sàwm bakah, NSS-te chu nasa lehzuala ṭan la turin a fuih a ni.

Chawimawina inkhawm kaihruaitu AVBD president C Lalnunnema chuan, Covid-19 leh inkhârkhip avangin pawl hrang hrangin dan pangngaiin blood donation camp an buatsaih thei lo tih sawiin, "Thisen mamawhtu damlote'n an nghei kan hlau si a, AVBD-in hma kan la a, pawl hrang hrangte thisen pe turin kan sàwm angin blood bank-ah pek a ni ṭhin. NSS-te hian nasa takin ṭan an la a, an chungah kan lawm tak zet a ni," a ti.

AVBD President sawi danin, NSS hnena chawimawina an hlan hi Covid-19 léng leh lockdown laia thisen pek kawnga an thawh ṭhat vang leh India ram puma NSS hmalaknaah Mizoram NSS-te hmalakna a hlutzia lantirna atan a ni a; voluntary blood donation award pangngai chu World Blood Donor Day (June 14)-ah sem an tum a ni.

NSS aiawha chawimawina dawngtu state NSS officer Dr Zir­lian­ngura chuan, thisen pek chu NSS hmalakna pawimawh tak a nih thu a sawi a; thisen pe turin NSS-te an inhawng reng a, anmahni'n calendar an siama an pek ṭhin bakah, ṭul bik thilah pe tura an inhuam reng thu a sawi bawk.