KHAWTHLIR

Covid vaccine pe turin hriattir
Sorkar laipui aṭanga hriattirna dawn angin Health secretary R Lalramnghaka'n nimin khan thuchhuah a siam a; Covid-19 vaccine pek kawnga thawktu zawng zawng, sorkar leh private hnuaia thawkte chu mipui mimirin vaccine an lâk theihna turin Pathianni tih loh ni dang zawngah April thla chhungin Covid Vaccination Centre-ah vaccine pe turin a hriattir.

Heroin man
Excise & Narcotics department (END) leh 46th Assam Rifles-te chuan April 14, Nilaini tlai dar 4 khan Thenzawl dáiah heroin gram 124 leh a neitua puh mi pathum - Vansangkimi (32) d/o Kaplinga, Sapum, Myanmar, Ramngaihsangi (40) d/o PC Thanzauva leh K Lalliana (60) s/o K Chalkhuma, Zotui, Lunglei district nia inchhálte an man. END chuan Nilaini vêk tlai dar 3 khan Chanmari, Aizawlah heroin gram 12 leh a neitua puh Rodinliana (34) s/o T Ngunsiama (L), Khawzawl an man bawk.

Sorkar thuchhuak zâwm turin chah
ZPM party chuan, Serchhip biala by-election naktuka neih turah danin campaign a phal tawh loh chinah chuan campaign tawh lo turin an mite an chah a, "Sorkar thuchhuakin a tarlan, Serchhip Assembly constituency chhunga campaign tura lut, Serchhip constituency-a vote nei lote chu April 15, Ningani tlai dar 6 hnu lama chàm zui a phal tawh loh avangin, ZPM mi leh sate chu sorkar thuchhuak zâwm vek turin kan hriattir a ni," an ti.

Campaign hun tâwp
Naktuka Serchhip biala Assembly by-election neih tura campaign hun chu nimin tlai dar 6 khan a tàwp. Inthlanah hian naktuk zing dar 7 aṭanga tlai dar 6 thleng vote thlak hun hawn a ni dawn a, vote thlâk hun tàwp aṭanga chhiar lêta darkar 48-na (nimin tlai dar 6)-ah campaign hun a tawp ṭhin a ni. Tun ṭum inthlanah hian party panga - BJP, INC, MNF, ZPM leh PC-te'n candidate an nei a, independent candidate pakhat nen candidate paruk an awm a ni.

ODF+ inhrilhfiah
Khawzawl Swachh Bharat Mission (Urban) kaltlangin UDPA department chuan nimin khan Khawzawla UDPA pisaah Open Defaecation Free Plus (ODF+) leh Khawzawl District Solid Waste Management Bye-Laws 2020 chungchang inhrilhfiahna hun an buatsaih. Mimi Lalrinngheti leh UPDA SDS K Lalramnghaka ten thil pawimawhte an sawifiah a ni.

Zirhona buatsaih
Nimin khan Lunglei leh Mamitah District Rural Development Agency-te'n Jal Shakti Abhyaan 'Catch The Rain' campaign leh MGNREGS zirhona an buatsaih. VC member leh district chhunga Rural Development block-a technical staff-te leh mawhphurhna neite an tel a ni.

SRH-ah mi 18 awm
State Referral Hospital-ah nimin khan Covid-19 vei mi pathum dah luh an ni a, anni nen hripui vei mi 18 an awm mek. Mi 18 zinga pahnih chu ICU-ah enkawl niin, pakhat chu ventilator hmantir a ni a; isolation ward-a awm zingah harsatna lian tham nei an awm lo.