COVID-19: Mizoram dinhmun 2021-a hmuh tam ber ní a thleng

April 14, Nilaini khan Mizoramah Covid-19 vei mi 37 hmuh chhuah a ni a, kumin chhunga hmuh tam ber ní niin, natna (symptom) lang mi 13 an awm. Nimin khan hripui laka fihlim tawh mi paruk chhuahtir an ni.

Covid-19 vei hmuh tharte chu mipa 19 leh hmeichhia 18 an ni a; ZMC laboratory-a hmuh chhuah mi paruk, True­NAT-PCR hmanga hmuh chhuah mi pahnih leh RAT hmanga hmuh chhuah mi 29 an ni.

Nimin khan Kanan Vengah RAT hmangin hripui vei mi pasarih hmuh belh leh a ni a, an zingah pitar kum 91 leh kum 71 mi an tel. Kanan Veng LTF Chairman chuan, an veng mi hripui vei enkawl mek mi 18 an awm tih a sawi. Nimina hmuh bik hi a pumpuia belhkhawmah telh a la ni lo.

Mizoramah Covid-19 vei mi 4,722 hmuh chhuah a ni tawh a, mipa 3,383 leh hmeichhia 1,339 an ni. Nimin tlai dar 5 thleng khan mi 4,477 (94.81%) chhuahtir an ni tawh a, mi 12 (0.26%) thi tawhin, enkawl mek mi 233 (4.93%) an awm. 

April 14, Nilaini khan ZMC laboratory-ah swab sample 278, TrueNAT-PCR hmangin district pangaah sample 48 leh RAT hmangin district 11-ah sample 1,991 endik a ni a; sample endik zawng zawng chu 2,317 (mipa 1,422 leh hmeichhia 895) niin, chu'ng aṭanga hripui vei hmuh 37 chu 1.60% a tling.

Covid-19 positive hmuh chhuah thar mi 37 zinga mi 12 chu Mizoram chhunga kái chhâwng nia hriat niin, mi 25 chu state páwn aṭanga rawn lut hlim leh tun hnaia rawn lutte an ni a; tualchhunga kái mi 11 zingah kàina hriat loh an awm lo. Symptom nei mi 13 an awm bawk.

Mi 37 zinga a tam zawk, mi 21 chu state pawn aṭanga rawn lut hlim, ramria screening point leh airport-a hmuh chhuah an ni a, Lengpui Airport-a hmuh chhuah mi 19 an awm. Nilaini kha kumina Covid-19 positive hmuh chhuah tam ber ní a nih mai bakah, November 23, 2020 hnua hmuh chhuah tam ber ní a ni.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah positive 2,686 hmuh chhuah a ni tawh a, TrueNAT-PCR hmangin 685 leh RAT hmangin 1,350 hmuh chhuah a ni tawh.

Hripui laka fihlim tawh mi paruk chu nimin khan enkawlna hmun aṭangin chhuahtir an ni a; SRH-ZMC aṭangin mi pakhat, Durtlang BSUP CCC aṭangin mi pathum leh Hnahthial CCC aṭangin mi pahnih an chhuak. IDSP Bulletin tarlan danin, April 11, 2021 thlengin Mizoramah swab sample 2,68,697 endik a ni tawh a, chu'ng aṭanga Covid-19 positive hmuh tawh zat 4,722 chu 1.76% a ni. Hripui vei hmuh tawh zinga mi 2,235 chu Mizoram chhunga kái chhâwng an ni a, mi 2,487 chu Mizoram páwn aṭanga an rawn luh hnua hmuh chhuah an ni thung.

Covid-19 vei hmuh chhuah tharte
ZMC-A HMUH CHHUAH
Damveng - 5: Mipa kum 28 & 31 leh hmeichhia kum 21, 46 & 59; positive hmuh tawhte nena inkungkaihna nei, ina inkhung lai, symptom nei lo vek.
Zarkawt - 1: Hmeichhia kum 58, April 9, 2021-a Delhi aṭanga thleng, inkhung lai, symptom nei lo.

TRUENAT-PCR-A HMUH
Lunglei Chanmari - 1: Hmeichhia kum 39, Delhi aṭanga haw, symptom nei lo.
Thenzawl - 1: Mipa kum 49, PTS-a awm, Assam inthlan duty-a kal haw, symptom nei.

RAT HMANGA HMUH
West Phaileng - 1: Hmeichhia kum 21, Mumbai aṭanga haw, Airport-a sample endik, symptom nei lo.
Aizawl Venglai - 1: Mipa kum 13, Dehradun aṭanga haw, Airport-a sample endik, symptom nei.
Lawngtlai - 2: Mipa kum 16 & 49, Delhi aṭanga haw, Airport-a sample endik, symptom nei lo.
Ramhlun North - 1: Mipa kum 25, Allahabad aṭanga haw, Airport-a sample endik, symptom nei.
ITI Veng - 1: Hmeichhia kum 23, Hyderabad aṭanga haw, Airport-a sample endik, symptom nei lo.
Lunglei - 1: Hmeichhia kum 23, Hyderabad aṭanga haw, Airport-a sample endik, symptom nei.
Venghlui - 1: Hmeichhia kum 26, Hyderabad aṭanga haw, Airport-a sample endik, symptom nei lo.
Khatla - 1: Hmeichhia kum 25, Hyderabad aṭanga haw, Airport-a sample endik, symptom nei.
Ramhlun South - 1: Hmeichhia kum 22, Hyderabad aṭanga haw, Airport-a sample endik, symptom nei lo.
Falkland Veng - 1: Hmeichhia kum 42, Bangalore aṭanga haw, Airport-a sample endik, symptom nei lo.
Siaha - 1: Mipa kum 26, Delhi aṭanga haw, Airport-a sample endik, symptom nei lo.
Bungkawn - 2: Hmeichhia kum 21 & 56, Bangalore leh Delhi aṭanga haw, Airport-a sample endik, pakhatin symptom a nei.
Selesih - 1: Mipa kum 20, Varanasi aṭanga haw, Airport-a sample endik, symptom nei lo.
Vaivakawn - 2: Mipa kum 34 & 21, Hyderabad leh Delhi aṭanga haw, Airport-a sample endik, pakhatin symptom a nei.
Ṭhuampui - 1: Mipa kum 33, Bangalore aṭanga haw, Airport-a sample endik, symptom nei lo.
Chaltlang - 1: Mipa kum 51, Delhi aṭanga thleng, Airport-a sample endik, symptom nei lo.
Kanan Veng - 4: Mipa kum 23, 31 & 65 leh hmeichhia kum 67, an vaiin chhungkaw khata awm. Pa ber April 1-a Delhi aṭanga haw, Airport RAT-a negative tawh, symptom a neih vanga April 14-a private hospital-a sample endik leh. Nu berin symptom a nei bawk.
Bethlehem Veng - 2: Mipa leh hmeichhia kum 25; tualchhunga kái, positive hmuh tawh nena inkungkaihna nei, symptom nei ve ve.
Chawlhhmun - 1: Hmeichhia kum 24, April 7-a Delhi aṭanga haw, symptom a neih vanga Kiosk, Chawlhmuna sample endik.
Mission Vengthlang - 1: Mipa kum 23, positive hmuh tawh nena inkungkaihna nei, symptom nei.
Venghlui - 1: Mipa kum 23, Shillong aṭanga haw, Vairengte screening point-a sample endik, symptom nei lo.
Lunglei - 1: Mipa kum 22, Delhi aṭanga haw, Bairabi screening point-a sample endik, symptom nei lo.