Covid-19 hluar thar leh avangin Mipui chêt velna khuahkhirh ṭul ti

Nimin khan Health minister Dr R Lalthangliana hoin Secretariat conference hall-ah tun hnaia Covid-19 hluar thar leh mek avanga hmalak dan tur rèl a ni. Meeting chuan, mipui chêt velna khuahkhirh ṭul an ti.

Ṭhutkhawmah hian Covid-19 veite enkawlna tur covid care centre (CCC) ruahman belh chung chang leh dedicated covid hospital chungchangte sawiho a ni. CCC tur tunah hual lâwk mek niin, mi 240 vel enkawl theihna Aizawlah hual lâwk tawh a nih thu leh, hmun dang pawh en belh zel bakah, district-ahte pawh hmalak mek a ni.

Mizorama Covid-19 hri hluar chak dan thlirin mipui chêt velna khuahkhirh a ṭul bakah chhungkua, ṭhianho leh páwl anga thil tih khawm leh puipunna huaihawt chungchang sawiho a ni a; sorkarin a ṭul angin ruahmanna a siam zui ang.

Health Minister chuan, Mizo­ramah Covid-19 vei February thlaah mi 51 chauh hmuh chhuah a nih laiin, April thlaah chuan thla chanveah mi 246 hmuh chhuah a nih tawh thu a sawi a, "Kan dinhmun a ṭha lo. A lan danah chuan, community spread a thleng ta emaw tih tur a ni. Zin veivâk hawin an kái nasa a, an chhungte pawhin an kái nasa tawh," a ti.

Dr R Lalthangliana chuan, Chief Minister phalnaa volunteer 900 chuang chhawr chu Covid-19 vei an tlem tâk avang leh sum dinhmun avangin chhawr an nih tawh loh thu sawiin, "Kan dinhmunin a zir loh avangin chhawr leh turin CM ka sawipui leh a ni," a ti a, CM chuan loh theih lohah volunteer chhawr leh a remtih thu a sawi.

Mizoram luhkáte khauh deuh taka kalpui a ngaih thu sawiin Minister chuan, "Vairengte aṭangin test loa tlang an awm tih thâwm a awm a, uluk zawka en thar leh a ngai ang. Enfiah turin naktuk (Zirtawpni) hian Vairengte ka tlawh dawn," a ti.Home minister Lalchamliana chuan, hripui kái an pun zel avangin random test neih ṭha a tih thu a sawi rualin, duh duh test ngawt thei an ni em tih erawh ngaihtuah a ngaih thu a sawi.

Medical Operational Team chairman Dr ZR Thiamsanga, MLA chuan, Covid-19 a hluar zual zel avang leh a thawh hnihna chu a hma aiin a nghawng a nat avangin medical lam chuan pulh mai an hlauhthawn thu a sawi a, "Kan hma hunah health lamah kan ngaih pawimawh zual a ngai dawn hle," tiin, MOT-in rawtna an neihte a sawi lang.

Chief secretary Lalnunmawia Chuaungo chuan, mipui chêt velna khuahkhirh dan zawn a ngai tih sawiin, "Dawr khâr tih ringawtte hi economy ngaihtuah a ngai si. Keini'n hlimhlawpa kan ngaihte hi tute'n emaw sum tam tak sénga eizawnna atana an hman a ni thei. Uluk tak leh khairual taka thil kalpui a ngai," a ti.

Chief Secretary chuan, DC-te thuneihna sang tak pek an nih thu sawiin, "Inthlana duty tura DC-te'n an ruat department hotute'n an dan a rem lo angin, Covid-19 atana pawh duh an neihte chu dan a rem lo. Duty tura ruat avanga hriselna dinhmun sawisel leh site chu an service buah ziah ve mai tur," a ti a; hun hmasaah Covid-19 avanga hah tak tak sorkar hnathawk an awm laiin, paid leave late an awm thu a sawi.

Mizoram Kohhran Hruaitute Committee aiawhte chuan, sorkar rorel ang zâwm tura an inpeih thu sawiin, "Zan inkhawm loh leh zai loh tihte pawh kan zâwm zel. Inkhawm loh tih a nih leh a, inhnialna a awm a nih pawhin sorkar thu kan zâwm mai turah kan ngai. Sorkar thu zawm tur pawhin kan inzirtir ṭhin. MKHC-a tel lo kohhran erawh an awm," an ti.

Covid-19 state nodal officer Dr Pachuau Malsawma tarlan danin, kumin March 29 aṭanga April 14 inkara Covid-19 vei hmuh chhuah mi 257 zinga 142 chu state páwn aṭanga rawn lut an ni a; Lengpui Airport aṭangin 110, Vairengte aṭangin 29, Kânhmun aṭangin pahnih leh Zokhawthar aṭangin pakhat a ni.

Lengpui Airport aṭanga lut zinga mi 26 chu airport-a RAT hmanga enfiahnaa negative, a hnua RT-PCR hmanga Covid-19 vei tih hmuh chhuah leh an ni a; Vairengte aṭanga lut mi paruk pawh RAT an paltlang hnuah hripui vei tih hmuh chhuah an ni bawk.