J Thankima College-in study tour nei mek
J Thankima College-a sixth semester zirlaite chuan an zirna atana ṭangkai turin tunlai hian Mizoram hmun hrang hrangah study tour an nei mek a, Mizoram hmun hrang hrang an tlawh.
J Thankima College-a History zirlai mi 14 leh zirtirtu pahnihte chuan nimin khan Mizo historical village zinga mi Chawngtlai khuaa Mizo hmun hlui pawimawhte a hmuna zir turin an kal a; Pawih pasalṭha Ralbilha thah a nih dan te, sahlàm te, Zoram humtu lal Nikuala in hmun te, lasi lalnu Ṭântinchhingi Khawpui Ṭântlang leh Nikuala inthawina te, mi thah kâwn (Pawih rálin Lusei an thah hnuhnun berna hmun)-te an zir chiang dawn a ni.
Nimin vek khan Mizo department zirlai 26-te leh zirtirtu pahnihte'n hla phuahthiam leh Mizo history nena inzawm khua - Khawbung, Farkawn, Vangchhia, Lianchhiari Lunglen tlang leh a chhehvelte a hmunah zir chiang turin Tuipuiral an pan.
Political Science zirlai 25 leh zirtirtu pahnihte chuan April 14, Nilaini khan Mizote'n zalenna an sual laia Mizo National Army Central Command headquarters pawimawh leh hnam sipai leh vai sipai indona hmun Maite an tlawh.
Economics zirlai 12 leh zirtirtu palite'n Dampa Tiger Reserve Forest chhehvel khuaah socio-economic survey an nei mek a, Forest leh eibâr inzawmna zir chian an tum a ni. Education zirlai 24 leh zirtirtu pahnihte'n Special Education paper chungchungah Kolasib-a Special Blind School: Home for the Blind an tlawh a, Tuirial Hydel Project tuikhuah bul vela zirna dinhmun an en chiang nghal ang.
Management zirlai 36 leh zirtirtu pangate'n Lengte khuaa Mizoram ISPAT Industry leh Koinonia Plant-te chu April 12 khan an tlawh a; English department zirlai 17 leh zirtirtu pathumte'n handicraft chungchang bèlchiang turin vawiin hian Thenzawl pan an tum bawk.