Tui connection thar pek remtih rih loh sorkar hlawhchhamzia tilangtu - MPYCC
Mizoram Pradesh Youth Congress Committee (MPYCC) chuan thuchhuah siamin, PHE department-in tui connection thar mipui pek an remti rih lo chu sorkar hlawhchhamzia tilangtu a nih thu an tarlang a; Mizoram sorkar chu mipui mamawh enkawl kawnga hlawhchhamah an puh.
MPYCC chuan, tunlaiin Mizoram hmun hrang hrangah tui a harsa a, Aizawlah phei chuan a harsat em avangin sorkarin tui connection thar pek a rem tawh rih loh thu PHE Chief Engineer kaltlanga April 13, 2021-a an chhuah chu mipui timangangtu a nih thu an sawi a, "MNF sorkarin sorkarna an chelh aṭanga kum hnih lek a liam hnuin Mizoram pumah mipui ni tin mamawh tuia harsatna nasa tak a thleng hi sorkar hlawhchham a nihzia a lang," an ti.
PHE Minister-in a chanvo a hneh loh avangin Aizawl leh Mizoram hmun hrang hrangah PHE-in tui an sem hlei thei lo tih sawiin Congress ṭhalaite chuan, "Mizoram mipui khawsak nasa takin a khaihlak a, sorkar hian mipui mamawhna chhànna ngaihtuah loin a hrêk zawngin hma a la ta zel zawk a ni," an ti a, beidawnthlak an tih thu an tarlang.
MPYCC chuan, MNF kaihhruai sorkarah hmasawnna a zuang lo a, mipuiin ni tina an mamawh electric, tui, petrol leh diesel mante a zuang zawk tih an sawi a, "MNF sorkar duhthusamin JERC kal se electric bill 41.92% laia sang tur a ni a, mahse, JERC-in em ema an tih avangin 20.68%-in tihpun a ni ta zawk," an ti a; chhiah petrol-ah 5% leh diesel-ah 2.5%-a pungte chu mipui harsatna thlentu a nih thu an sawi.
Congress ṭhalaite chuan, MNF sorkarin an party mite duhsak an tumnaah two wheeler taxi permit tam tak an pe chhuak tih sawiin, "Eizawnna nei lo tam takin eizawnna thar an neih phah hi a lawmawm. Chutih rualin, two wheeler taxi stand tur ngaihtuah nacháng an hre lo a, phurrit leh harsatna an thlen mek a ni," an ti bawk.