PM-in governor-te Covid-19 a sawipui

Prime minister Narendra Modi chuan April 14, Nilaini zan khan state hrang hrang governor-te video conference kaltlangin a kâwm a; Covid-19 léng dona leh hri danna pek meka hmalak tawh dan leh hmalak zel dan turte a sawipui. He hunah hian Mizoram Governor PS Sreedharan Pillai pawh a tel.

Narendra Modi chuan, Covid-19 donaah khawvelah India chu thawk ṭha ber pawl a nih thu sawiin, "Testing, tracking leh tracing-ah state tinte ṭan lak chhunzawm a ṭul," a ti a; Covid-19 test nan RT-PCR a pawimawh thu a sawi.

Prime Minister chuan, "Tuna RT-PCR test zat 60% ni mek chu 70%-ah tihsan a ngai. India ram hi hri danna pek chhuah kawngah vbc. 10 pe chhuak hmasa ber a ni a, ni li liam taa Tika Utsav kalpuiin rah ṭha a thlen a, ṭan lâk chhunzawm zel erawh a ngai," a ti.

State governor-te chu ṭan la lehzual tur leh an theihna zâwnah inrawlh tam tura chahin PM Modi chuan, "Chief Minster-te hmalakna in thlâwp tlat a ngai. A ṭul hun a piangah all party meeting koh leh webinar-te hmanga thingtlang mite harsatnate sutkianpui dan in zawn a ṭul," a ti a; tlawmngai pawlte pawh Covid-19 donaa ṭan la turin a sáwm nghal.

Vice President M Venkaiah Naidu pawhin thu sawiin, Governor-te mawhphurhna a sawi a, "Constitutional head in nihna angin state tinah CM-te hmalakna thláwpa thuràwn in pek a ngai. Ṭan lâk ngai laite in kawhhmuh ṭhin a pawimawh," a ti a; media, kohhran hruaitu, college zirlai leh tlawmngai pawlte theihna hmang thiam tur leh thawhpuia sáwm turin chah.

Union Health Secretary tarlan danin, India ramah hmai tuamna (mask) vuah ṭha peih an tlem a, 50% chiahin an vuah. A vuah zinga 14%-in an vuah dik a, 64% chu hnár hup loa vuah niin, 20%-in an khabe tuam nan an hmang a, 2%-in an awrh anga hriat a ni.

Mizoram Health secretary R Lalramnghaka tarlan danin, April 13, 2021 thleng khan Mizoramah Covid vaccine dose 1,11,086 pek a ni tawh a, mi 26,413-in vaccine an la zo tawh. Mizoramin vaccine dose 2,00,480 a dawng tawh a, vaccine lâk vanga harsatna tênau nei 491 an awm. Tunah hian ni khatah vaccine dose 9,000 pek chhuah anga chhût a ni.