Mi pakhat thihna lirthei che sualah Ralthuam eng emaw zat man a ni

Nilaini zan zanlai pelh hnu, nimin zing dar 1 vel khan Thenzawl leh Serchhip inkarah lirthei, Bolero a chesual a, mi pakhat a thi. Bolero-ah hian rálthuam eng emaw zat man a ni a, an ruala tlân Bolero dangah pawh ralthuam man a ni.

Vanglaini thu dawn danin, Bolero pahnih hi man cháwia hman chi (rental) ve ve a ni a, a chesual zawkah mi pahnih chuangin, a khalhtu a thi. Lirthei khalhtu chu Ramhlun South-a mi niin police-te chuan an chhinchhiah a, chuang ve dang chu Sangau khaw mi niin, a hliam avangin police venna hnuaiah damdawi-inah enkawl a ni.

Hetih lai hian, Ram­hlun South aṭanga thu dawn danin, lirthei chet­sualnaa thi ta chu an venga in luah ṭhin ni mah se, a awm mumal ngai lo a, a ruang pawh veng dang­ah lâk a ni.

Lirthei chesual ta nena inzui Bolero pakhat zawk chu Ramhlun North-a mi a ni a, ralthuam a phurh ve tho avangin Serchhip police-te'n thu zawhfiah turin an la a ni.

Lirthei pahnih aṭang hian silai 11, a mu eng emaw zat, mobile phone, SIM card leh WT set man a ni. Silai an mante chu ulbun, revolver, airgun, 315 rifle, US carbine leh airgun a ni a; a tam zawk chu tualchher a ni.

Vanglaini palai zawhna chhangin police hotute chuan, thil thlen dan an chhui chiang a, an mi mante thu an zawhfiah mek avangin an hming hriat theih a la ni lo a, silaite chu khawi aṭanga lei nge tih leh, tute ta nge tih an la puanzar theih loh thu an sawi.