Lokayukta chairman atan C Lalsawta lalut

Mizoram Lokayukta chairman atan C Lalsawta (63), IAS (Rtd.) chu nimin khan Raj Bhavan-ah Governor Prof. Jagdish Mukhi-a'n rinawmna thu tiamtirin a la lut.

Lokayukta chairman lak luhna inkhawm hi chief secretary Lalnunmawia Chuaungo-in a kaihruai a; chief minister Zoramthanga, Assembly speaker Lalrinliana Sailo, minister-te leh MLA-te bakah, sorkar senior officer-te an tel. Chief Secretary sawi danin, Lokayukta chairperson term hi kum 5 chhung emaw, kum 70 an tlin thleng emaw a ni.

C Lalsawta hian B.A a zawh hnuah UPSC hnuaia civil services exam-ah IAAS-ah a inziak tling a, chumi hnuah kum 1981-ah IAS-ah a inziak tling a, Bihar cadre-ah dah a ni.

Sorkar hna a thawh chhungin C Lalsawta hi Mizoramah kum 2008 aṭanga 2011 thleng khan principal secretary hna a chelh a, September 2015 khan superannuation pension-in a chhuak a ni.

Eirukna dotu tur Lokayukta dinna tur dan thar, ‘The Mizoram Lokayukta Bill, 2014’ chu November 13, 2014 khan Mizoram Assembly Session-ah pass a ni.

Bill pu luttu khatih hunlaia Law minister Lalsawta sawi danin, Lokayukta hian eiruknaa inhnamhnawih nia hriatte chungchanga thu thehluh chhuiin a enfiah ang a, eirua puhte chungthu ngaihtuahtu leh hremtu tur erawh chu Special Court a ni ang.

Thuneihna sang tak a neih dawn avangin thil chhui turin agency hrang hrang, CBI thlengin a hmang thei ang a, an mi chhuite sawn leh chawlhtir thlengin thuneihna an nei dawn a ni.

Law minister nilai TJ Lalnuntluanga'n Vanglaini a hrilh danin, Lokayukta atan hian chairman chiah ruat a ni hrih dawn a, a tahtawlin member tur chu ruat a ni ang. Mizoram Lokyukata-ah hian member pahnih awm tura ruahman a ni.

Lokayukta nihphung ṭhenkhat:
. Term - kum 5 emaw, kum 70 tlin thleng.
. Chairman hlawh - High Court chief justice hlawh ang.
. Member-te hlawh - High Court judge-te hlawh ang.
. Directorate of Inquiry Investigation and Prosecution din a ni ang a, state sorkara secretary rank, secretary leh, addl. secre­tary rank-te director-ah dah tur a ni.