Zophai thil thleng UN-ah thlen an tum

Inner Line Reserved Forest chung­chang buaipuitu Joint Action Committee (JAC) hruaitute chuan nimin khan Aizawl Press Club-ah thuthar thehdarhtute an kâwm a; March 10, 2018-a Bairabi Zophaia thil thleng chu United Nations Organisation (UNO)-a hnam tlem zawng­te chungchang ngaihtuahtu commi­ttee-ah thlen an tum thu an puang.

JAC hruaitute chuan, "Nikum March 10-a Zophai thil thleng kan hre reng dawn a, kan theihnghilh dawn lo. Zophaia MZP-te'n kan ram humhalh tura hma an lakna kha JAC hian a thàmral a remti ngai dawn lo. Kha thisen chhuahna rapthlak tak mai kha september 7, 2007-a ‘UN leh ram leilung fate’ tih thupui hmanga dan siam bawhchhiatna nasa tak a ni," an ti.

Bairabi Zophaia Assam sipaite chêt dan chu an dem tak zet a ni tih an puang thar leh tih sawiin JAC hruaitute chuan, "Kha thil thleng kha UN-ah thlen kan tum a, dan loa an chêt dan kan au chhuahpui dawn," an ti a; finfiahna document leh video mumal tak nen thlen ngei an tum thu an sawi.

JAC hruaitute chuan, "Declaration on the RIght of Indigenous People Article 7 (1 & 2), Article 8 (1 & 2), (A), (B), (C), (D), Article 10-a ram leilung fate dikna leh chan­vo humhimna dan UN-in a puante chu Assam sipaite khan an bawhchhe chiang a, a finfiah­na pawh kan nei a ni," an ti bawk.

JAC chuan, pawl leh party dahṭha a, Mizo ram leh kan hnam humhalh turin Mizo mipui zawng zawng an sáwm a ni.