CYMA-in AR chhuahsan ram Mimal kuta a luh an remti lo

Central YMA chuan, Assam Rifles-te'n an chhuahsan tur ram chu mimal hnenah sahthlak an remti ngai dawn lo tih an tarlang a, "Mizo mipui tana rotling siam nan hman a nih ngei theih nan a tawp thlengin hmalak kan tum a, AR hmuna LSC fel lo taka lo neite pawh Mizo mipui tana rilru zau tak pûa LSC fel lo kawl reng lo turin kan ngen a ni," an ti.

CYMA thuchhuah chuan, February 19, 2019-a Ministry of Home Affairs thuchhuakin Aizawl khawpui laili aṭanga Assam Rifles-te Zokhawsang hmuna May 31, 2019 aṭanga insawn chhuak tura a ti ta chu lawmawm an tih thu leh, AR ram chu mimal kuta a luh lohna tura March 8, 2019-a Council of Minister ṭhukhawmin thu­tlukna an siam chu lawm­awm an tih thu a tarlang.

AR sipaiin an luah reng laia Lammual leh a chehvela LSC nei eng emaw zat an awm chu mak an tih thu sawiin CYMA chuan, "Sipaite'n an luah reng chunga fel lo taka LSC pek chhuah a ni hi kan dem tak zet a, he thila mawhphurtute chhui chhuak a, an chunga na taka hremna pek ngei CYMA chuan a phût a ni," an ti. Lammual leh a chhehvel ramte mimal kuta a luh loh nan Mizo mipui zawng zawng ṭangrual tura an beisei thu an sawi bawk.